დიდი ბრიტანეთის რიდინგის უნივერსიტეტის პროფესორის, არქეოლოგ კენ დარქის განცხადებით, ისრაელში მდებარე ქალაქ ნაზარეთში მან I საუკუნით დათარიღებულ სახლის ნანგრევებს მიაკვლია, რომელშიც, მეტად სავარაუდოდ, იესო ქრისტე თავის ოჯახთან ერთად ცხოვრობდა.
დარქის თქმით, შენობის ნაშთები ეკუთვნის V-VII საუკუნეების ბიზანტიურ ეკლესიას, რომლის ადგილზეც მოგვიანებით ნაზარეველი დების ქალთა მონასტერი აუგიათ. სწორედ ამ ტაძრის ქვეშაა მოქცეული ძველი სახლის ნანგრევები. არქეოლოგი ირწმუნება, რომ ეს სწორედ ის ტაძარია, რომელიც უძველეს, VII საუკუნით დათარიღებულ ჩანაწერებშია ნახსენები.
„ბიზანტიური წყაროებიდან ცნობილია, რომ მარიამისა და იოსების სახლის ადგილზე ჩვილი იესოსადმი მიძღვნილი ტაძარი ააშენეს, თავად შენობის ნაშთები კი საკურთხევლის ქვეშ მდებარე კრიპტში შენარჩუნდა. მას ჩვენამდე არ მოუღწევია, თუმცა VII საუკუნის ავტორებისგან ვიცით, რომ ეს ადგილი მრავალი წლის განმავლობაში ქრისტიანული პილიგრიმობის ცენტრი იყო. დარწმუნებული ვარ, რომ ეს სწორედ ის ტაძარია.“ – აცხადებს პროფესორი დარქი BBC-სთან საუბარში.
მეცნიერის თქმით, სახლი, რომელშიც, სავარაუდოდ, იესო ქრისტემ ბავშვობა გაატარა, ქვაში ოსტატურადაა ამოკვეთილი, რაც, მისი აზრით, უბრალო დამთხვევა არ უნდა იყოს. როგორც ცნობილია, იოსები დურგალი გახლდათ. ის ახალ აღთქმაში „ტექტონად“ მოიხსენიება, რაც მხოლოდ დურგალს არ ნიშნავს, არამედ ხელოსანს, რომელსაც სახლის აგებაც შეეძლო.
„სახლი სრულად შესაბამება იმას, რასაც შეიძლება მოველოდებოდეთ ხელოსნის საცხოვრებლისგან. ვინც სახლი ააშენა, მას ქვის დამუშავების შესანიშნავი ცოდნა უნდა ჰქონოდა. მართალია, „ტექტონი“, როგორც წესი, დურგლად ითარგმნება, მაგრამ რეალურად ეს ნიშნავს ხელოსანს, რომელსაც მშენებლობასთან აქვს კავშირი.“ — ამბობს არქეოლოგი.
აღსანიშნავია, რომ მონასტრის ქვეშ სახლის ნაშთები არქეოლოგებმა ჯერ კიდევ 1880-იან წლებში აღმოაჩინეს. 1888 წელს კი პირველად გაჟღერდა მოსაზრება, რომ ქრისტე ადრეულ ასაკში სწორედ იქ ცხოვრობდა. მოსაზრება ბიბლიის ცნობილ მკვლევარს, ვიქტორ გერინს ეკუთვნოდა. 1930-იან წლებში მეცნიერებმა ეს ვარაუდი უსაფუძვლოდ მიიჩნიეს და გათხრების ადგილიც მიატოვეს, თუმცა 2006 წელს ნაზარეთში კენ დარქი ჩავიდა. იგი ამ ქალაქის, როგორც ბიზანტიურ ეპოქაში ქრისტიანული მომლოცველობის ცენტრის, ისტორიის შესწავლით იყო დაკავებული და 14-წლიანი მუშაობის შედეგად ზემოხსენებულ დასკვნამდეც მივიდა.
კენ დარქის ჰიპოთეზა საყურადღებოდ მიაჩნიათ მის კოლეგებსაც, თუმცა, მათი აზრით, მისი მართებულობის დასამტკიცებლად დამატებითი არქეოლოგიური გათხრების ჩატარება და ნაზარეთის ცენტრალურ ნაწილში არსებული სხვა ნანგრევების შესწავლაა საჭირო.
პროფესორის თქმით კი, ის ფაქტი, რომ დაახლოებით IV საუკუნეში სახლის მიმდებარე ბორცვზე გამოქვაბულის ეკლესია დაარსდა, მომდევნო საუკუნეში კი მის თავზე დიდი ტაძარი აიგო, აშკარად მეტყველებს იმაზე, რომ მშენებლებს ეს ადგილი რელიგიური თვალსაზრისით მეტად მნიშვნელოვნად მიაჩნდათ.
