ვაშინგტონში მდებარე ბიბლიის მუზეუმში საშობაო განწყობაა, თუმცა წელს ყველაფერი სხვანაირადაა პანდემიის გამო. მუზეუმი მზადაა საშობაო გამოფენის სტუმრებს უმასპინძლოს. შენობაში შესვლისთანავე შენიშნავთ მოწოდებას „მიჰყევით ვარსკვლავს“, რასაც მოჰყვება საოცარი გამოფენა მუზეუმის დიდ დარბაზში.
სინათლის ხელოვნებით შექმნილი სკულპტურები, ციფრული ეკრანები და მუსიკა შობის ისტორიას მოუთხრობს მნახველს. უზარმაზარი ვარსკვლავი კი გამოფენის ცენტრშია მოთავსებული.
გამოფენაზე შესაძლებელია ცნობილი მოქანდაკის, ტიმ შმალცის სკულპტურის, „ქრისტეს შობის სცენის“, ნახვა:
მუზეუმში ასევე გამოფენილია „შობა მალტაზე“. ეს გახლავთ მალტაზე შექმნილი ქრისტეშობის ათი სცენა, რომლებიც მრავალსაუკუნოვანი ტრადიციის მიხედვით არის გაკეთებული.
მუზეუმის აღმასრულებელი დირექტორი ჰარი ჰარგრეივი იმედოვნებს, რომ ახლომახლო მცხოვრები ადამიანები აუცილებლად ესტუმრებიან გამოფენას.
„1 700 000 მნახველი ესტუმრა მუზეუმს ბოლო სამი წლის განმავლობაში. მუზეუმი, რა თქმა უნდა, წელსაც ღიაა არსებული სირთულეების მიუხედავად. ის კვირაში შვიდი დღე ღიაა. ჩვენ ვართ პირველი მუზეუმი, რომელიც ხელახლა გაიხსნა და მოუთმენლად ველოდებით სტუმრებს.“ – განუცხადა ჰარგრეივმა CBN News-ს.
მუზეუმის აღმასრულებელ დირექტორს სურს, რომ მუზეუმი გამამხნევებელი ადგილი იყოს მნახველებისათვის.
„იმედი გვაქვს, რომ ეს იქნება იმედის ადგილი, ადგილი, სადაც ადამიანები დარწმუნდებიან იმაში, თუ რა არის ჭეშმარიტება. ჩვენ ვფიქრობთ, რომ ბიბლიაა ჭეშმარიტება.“ – ამბობს იგი.