გრემის მიერ ნომინირებული ქრისტიანული ჯგუფი MercyMe გვიზიარებს რეალურ ისტორიას მათ მიერ ახლახან ჩაწერილ სიმღერასთან დაკავშირებით. „Say I Won’t“ – სიმღერა შთაგონებულია ერთი გმირი კაცის ისტორიით, რომელმაც ცხოვრების უდიდესი კრიზისი სიმტკიცითა და რწმენით გადალახა.
ეს სიმღერა უკავშირდება გერი მირაქლს, ადამიანს, რომელიც ათწლეულების განმავლობაში ჯგუფის წევრებთან ერთად მუშაობდა. 2020 წლის იანვარში გერიმ ხელისა და ფეხის კიდურები დაკარგა მძიმე ავადმყოფობისა და სეპტიკურ შოკში ჩავარდნის შედეგად. მაგრამ ამ ტრავმის მიუხედავად, გერიმ მტკიცედ გადაწყვიტა, რომ სასოწარკვეთილებაში არ ჩავარდნილიყო და ინვალიდობისთვის ხელის შეშლის უფლება არ მიეცა.
მან ცოტა ხნის წინ Good Morning America-ს განუცხადა: „როგორც იობის 1:21 ამბობს: ‘უფალმა მომცა და უფალმა წაიღო’. მან ჩემი ხელები და ფეხები წაიღო, მაგრამ ამ მუხლის დანარჩენ ნაწილში ნათქვამია: ‘კურთხეულ იყოს უფლის სახელი’. ეს არის ის გზა, რომელსაც ახლა მე ვირჩევ“.
იობი 1:21 – „თქვა: შიშველი გამოვედი დედაჩემის მუცლიდან და შიშველი დავბრუნდები იქ. უფალმა მომცა და უფალმა წაიღო. კურთხეულ იყოს უფლის სახელი!“
MercyMe-ს წამყვანმა მომღერალმა ბარტ მილარდმა კი განაცხადა, რომ იგი ისე იყო აღფრთოვანებული გერის შთამაგონებელი ისტორიით, რომ სურდა, ეს მსოფლიოსთვის გაეზიარებინა.
„წარმოუდგენლად რთულია გერის სიტუაციის აღქმა, მისი ცოლ-შვილისა და იმის ყურება, რასაც ისინი განიცდიან, მაგრამ ისინი გერის გვერდში უდგანან და მხარს უჭერენ მას, რაც მარწმუნებს იმაში, რომ ეს სიყვარულის სრულიად სხვა განზომილებაა.“ – განაცხადა მან.
სიმღერის კლიპში ნაჩვენებია გერის გამოჯანმრთელების სხვადასხვა ეტაპი, მაგალითად, ერთ-ერთი ასეთი კადრი აჩვენებს, თუ როგორ სწავლობს გერი წერას თავისი პროტეზირებული ხელებით. ეს ვიდეო ასევე გვიჩვენებს ხალხს აბრებით ხელში, რომლებიც ამბობენ, რომ ისინიც გადალახავენ პირად პრობლემებსა და განსაცდელებს. როგორც მილარდმა განაცხადა, გერის ძალიან უნდოდა, რომ მის ისტორიას ვინმე გაემხნევებინა.
„ჩვენ ყველა გავდივართ განსაცდელს,“ – განმარტა გერიმ. – „ჩემი განსაცდელი ახლა უფრო თვალსაჩინოა, ვიდრე სხვისი განსაცდელი, მაგრამ ეს არ ნიშნავს, რომ სხვას არ უწევს ბრძოლა ამ ცხოვრებაში. MercyMe-ს ჯგუფმა საშუალება მომცა მეჩვენებინა, თუ რა ბრძოლას გავდივარ და სწორედ ამგვარად შევძელი ხალხის გამხნევება, ამიტომ მე უაღრესად მადლობელი ვარ ამ ადამიანების“.