საქართველოს ევანგელურ-ბაპტისტური ეკლესიის ეპისკოპოსმა მერაბ გაფრინდაშვილმა 5 ივლისს თბილისში განვითარებულ მოვლენებთან დაკავშირებით სპეციალური განცხადება გამოაქვეყნა, რომელსაც უცვლელად გთავაზობთ:
„ადამიანის სიტყვის და აზრის გამოხატვის თავისუფლება არის ფუნდამენტური უფლება, რომელიც ნებისმიერი სოციალური ჯგუფისთვის უნდა იყოს ხელმისაწვდომი. ცივილიზებული სამყაროსთვის ამ უფლების დაცვის გარანტორი არის სახელმწიფო.
5 ივლისს, თბილისში ჟურნალისტებზე განხორციელებული მასობრივი თავდასხმა სხვაგვარად ვერ შეფასდება, თუ არა თავისუფალ სიტყვაზე შეტევად. ეს დღე არის უკან გადადგმული უზარმაზარი ნაბიჯი საზოგადოების პოლარიზებისა და დაპირისპირებისაკენ.
ძალადობას, სიძულვილსა და ფიზიკური ანგარიშსწორებას არაფერი აქვს საერთო ქრისტიანობასა და ღმერთის სიყვარულთან. პროტესტის მშვიდობიანი ფორმით გამოხატვის უუნარობა, ღმერთის სახელით ადამიანთა ტერორი ცხადად აჩვენებს ქრისტიანობის სერიოზულ კრიზისს ჩვენს ქვეყანაში.
დღეს ქრისტეს ეკლესია სერიოზული გამოწვევის წინაშე დგას საქართველოში. იქნებ დადგა დრო, ჯეროვნად დავანახვოთ ადამიანებს ღმერთისა და მოყვასის სიყვარული, რომელიც არის მიტევება, შერიგება და შენდობა.
5 ივლისს, თბილისში განვითარებულ ძალადობრივ მოქმედებებზე მთელი პასუხისმგებლობა ეკისრება ქვეყნის ხელისუფლებას. მოვუწოდებთ მათ, აღკვეთონ ძალადობა, დასაჯონ მოძალადეები და დაიცვან ყოველი მოქალაქის თავისუფლება და კონსტიტუციური უფლებები, რაც უზრუნველყოფს ქვეყნის მშვიდობიან და სტაბილურ განვითარებას.
ევანგელურ-ბაპტისტური ეკლესიის ეპისკოპოსი მერაბ გაფრინდაშვილი“