რელიგიური ორგანიზაციები ქალთა და ოჯახური ძალადობის წინააღმდეგ

9 ნოემბერს სასტუმრო „რუმსში“ საინფორმაციო შეხვედრა გაიმართა რელიგიური გაერთიანებების წარმომადგენლებთან, თემაზე „ოჯახში ძალადობა და ნაადრევი ქორწინება“. პროგრამის მხარდამჭერი ევროკავშირი გახლავთ და იგი ხორციელდება გაეროს ქალთა ორგანიზაციისა (UN WOMEN) და გაეროს მოსახლეობის ფონდის (UNFPA) მიერ.

შეხვედრაზე, რომელიც პროგრამა – „ევროკავშირი გენდერული თანასწორობისათვის“ მიერაა ორგანიზებული, იმსჯელეს სახელმწიფოსა და რელიგიური გაერთიანებების როლსა და ძალისხმევაზე ოჯახში ძალადობის, ბავშვთა ასაკში ქორწინებისა და ქალისა და გოგონას მიმართ სხვა საზიანო პრაქტიკის აღმოფხვრის საქმეში.

რელიგიის საკითხთა სახელმწიფო სააგენტოს თავმჯდომარემ, ზაზა ვაშაყმაძემ, ყურადღება გაამახვილა რელიგიური ორგანიზაციების როლზე ქალთა მიმართ და ისაუბრა ოჯახური ძალადობის წინააღმდეგ ბრძოლის პროცესზეც. მისი თქმით,  რელიგიურ ორგანიზაციათა წარმომადგენლებს მჭიდრო კონტაქტი აქვთ მრევლთან, საზოგადოებასთან, რაც მათ გადამწყვეტ როლს ანიჭებს ქალთა და ოჯახური ძალადობის წინააღმდეგ ბრძოლის კამპანიაში და ეს პოტენციალი სრულად უნდა იქნეს გამოყენებული.

რელიგიური გაერთიანებების წარმომადგენლებმა შეხვედრაზე აღნიშნეს, რომ ისინი სრულად იზიარებენ სახელმწიფოს პოლიტიკას ქალთა უფლებების დაცვის თვალსაზრისით და მზად არიან, მაქსიმალურად შეუწყონ ხელი ამ მხრივ განხორციელებულ ყოველ აქტივობას.

როგორც შეხვედრის მონაწილეებმა განაცხადეს, მიუხედავად სახელმწიფოს მიერ გატარებული ღონისძიებებისა, ქალთა და ბავშვთა უფლებები, ოჯახური ძალადობა მაინც გამოწვევად რჩება ჩვენს ქვეყანაში და მათი გადაჭრისათვის საზოგადოების ყველა წევრის მხარდაჭერაა საჭირო.

პროგრამა აღმოსავლეთ ევროპისა და სამხრეთ კავკასიის რეგიონის ექვს ქვეყანაში მიმდინარეობს. საქართველოში მის სამიზნე რეგიონებად ამჟამად იმერეთი და გურია შეირჩა. რელიგიურ ლიდერებთან კომუნიკაციის ფარგლებში, უკვე შედგა შეხვედრა როგორც საქართველოს მართლმადიდებელი და რომის კათოლიკე ეკლესიის, ისე ებრაული და მუსლიმანური თემის წარმომადგენლებთან.