„ხმა აიმაღლეთ უსამართლობის წინააღმდეგ“ – „ევანგელური ალიანსი“ განცხადებას ავრცელებს

„საქართველოს ევანგელური ალიანსი“ საკუთარი „ფეისბუკის“ გვერდზე უკრაინაში მიმდინარე მოვლენებს ეხმაურება და ოფიციალურ განცხადებას ავრცელებს:

„ჩვენ, საქართველოს ევანგელურ ალიანსში შემავალი ევანგელური ეკლესიები დიდი გულისტკივილით ვადევნებთ თვალს უკრაინაში მიმდინარე მოვლენებს. ვწუხვართ და განვიცდით საომარი მოქმედებების შედეგად უამრავი ადამიანის, მათ შორის ქალების, ბავშვებისა და მოხუცების გარდაცვალების გამო. უკრაინაში მიმდინარეობს უსამართლო ომი. უცხო ქვეყანა თავს ესხმის სუვერენულ სახელმწიფოს, არღვევს საერთაშორისო სამართლით აღიარებულ სუვერენიტეტს, ტერიტორიულ მთლიანობას და განადგურებით ემუქრება თავისუფლების მოყვარე უკრაინელ ერს.

ყოველგვარ ზღვარს სცილდება საცხოვრებელ სახლებზე, საავადმყოფოებზე, საბავშვო ბაღებსა და ეკლესიებზე სარაკეტო და ავიაიერიშების მიტანა, რომელსაც უკვე შეეწირა და ეწირება უდანაშაულო ადამიანების სიცოცხლე, უკრაინის ქალაქები და სოფლები ჰუმანიტარული კატასტროფის წინაშე დგას.

მოვუწოდებთ მსოფლიო ევანგელურ ეკლესიებს, ყველა რელიგიის წარმომადგენელს და სრულიად მსოფლიო საზოგადოებას, მეტი ძალისხმევა გამოიჩინონ იმისათვის, რომ დასრულდეს ეს ამაზრზენი ძალმომრეობა.

ასევე მოვუწოდებთ რუსეთის ფედერაციაში მოღვაწე ქრისტიანულ ეკლესიებს და სამოქალაქო საზოგადოებას, რომ მთელი გაბედულებით ხმა აიმაღლონ ამ დიდი უსამართლობის წინააღმდეგ, რაც დღეს უკრაინის მიწაზე ხდება მათი ქვეყნის აგრესიის გამო.

სოლიდარობას ვუცხადებთ თავისუფლებისათვის მებრძოლ უკრაინელ ხალხს და ვლოცულობთ, რომ ღმერთმა დალოცოს და დაიფაროს უკრაინა.“

განცხადებას ხელს ალიანსში შემავალი ევანგელური ეკლესიები აწერენ:
1. საქართველოს სახარების რწმენის ეკლესია;
2. საქართველოს ევანგელურ-ბაპტისტური კავშირი;
3. საქართველოს ევანგელურ-პროტესტანტული ეკლესია;
4. წმიდა სამების პროტესტანტული ეკლესია;
5. დამოუკიდებელ ევანგელურ ეკლესიათა ასოციაცია;
6. ევანგელური ეკლესია სიცოცხლის სიტყვა;
7. საქართველოს ევანგელურ-ლუთერული ეკლესია;
8. ხსნის არმია.

შეგახსენებთ, რომ რუსეთმა უკრაინაზე სრულმასშტაბიანი თავდასხმა 24 თებერვალს, გამთენიისას, ერთდროულად რამდენიმე დიდი ქალაქის, მათ შორის, კიევის დაბომბვით დაიწყო. ქალაქების დაბომბვამდე სულ რაღაც 20 წუთით ადრე რუსეთის პრეზიდენტმა, ვლადიმერ პუტინმა უკრაინას ომი ვიდეომიმართვით ოფიციალურად გამოუცხადა. პუტინის მიერ უკრაინისთვის ომის გამოცხადებას წინ უძღოდა დონეცკისა და ლუგანსკის თვითგამოცხადებული რესპუბლიკების მარიონეტული რეჟიმების ფორმალური თხოვნა კრემლისადმი, დახმარებოდნენ „უკრაინული აგრესიის“ მოგერიებაში.