ბევრი ქრისტიანი უნაყოფო გახდა. ისინი სულიერად შიმშილობენ და არ აქვთ სულიერი ძალაუფლება. ბევრი ოჯახი დაინგრა, ბევრის შვილები განუდგნენ რწმენას. მრავლდებიან ხორციელი ქრისტიანები, რომლებიც ამტკიცებენ, რომ სიმართლის მემკვიდრენი არიან.
ღმერთი განიზრახავს ‒ განწმინდოს და განკურნოს თავისი ეკლესია, თავისი სასძლო, და მისცეს მას თავისი ჭეშმარიტი შვილები, რომლებიც მისი გულისათვის სათნონი არიან.
გაიხარე, ბერწო, უშობელო! სიხარულით აყიჟინდი, სალმობის განუცდელო! რადგან მიტოვებულს მეტი შვილი ეყოლება, ვიდრე გათხოვილს, ამბობს უფალი.
ღმერთი არ ამბობს იმას, რომ ბრბოებით გაავსებს მართალთა რიგებს. ეს გაცილებით ღრმა მნიშვნელობის მქონეა, ვიდრე უბრალო რიცხვები, ბრბოები ან გარეგნული წარმატება. ღმერთი დაითვლის. ის აღრიცხავს.
უფალი ჩაწერს ხალხთა ნუსხაში: ეს დაიბადა აქ.
შეხედეთ ქრისტიანთა ნებისმიერ თავყრილობას: შესაძლოა, ათასობით იყვნენ შეკრებილნი, ხმამაღლა, ხელაპყრობილნი გალობდნენ, მაგრამ ღმერთი ითვლის. მან იცის, ვინ არის წმინდა მათ შორის, ვინ ინანიებს გულწრფელად, ვინ გლოვობს საკუთარ ცოდვათა გამო. ღმერთზე ბრბოები არ ახდენენ შთაბეჭდილებას.
ღმერთი, თავისი სახელის გულისათვის, დაუშვებს იმას, რომ მოხდეს უკანასკნელი გამოღვიძება. უფლის სახელი განდიდდება მთელი ქვეყნიერების წინაშე.
ნება მომეცით, გაგიზიაროთ ეზეკიელის დიდებული წინასწარმეტყველება:
მაგრამ მე დავითმინე ჩემი წმიდა სახელის გამო, რომელიც შელახა ისრაელის სახლმა იმ ხალხში, სადაც მივიდნენ. ამიტომ უთხარი ისრაელის სახლს, ასე ამბობს-თქო უფალი ღმერთი: თქვენი გულისთვის არ აღვძრულვარ, ისრაელის სახლო, არამედ ჩემი წმიდა სახელისთვის, რომელიც შელახეთ იმ ხალხში, სადაც მიხვედით. წმიდავყოფ ჩემს დიად სახელს, შელახულს იმ ხალხებში, რომელთა შორისაც თქვენ შელახეთ; მაშინ მიხვდებით, რომ უფალი ვარ, ამბობს უფალი ღმერთი, როცა ჩემს სიწმიდეს გამოვაჩენ თქვენში მათ თვალწინ. გამოგიყვანთ ხალხებიდან, გამოგკრებთ ყველა ქვეყნიდან და მოგიყვანთ თქვენს მიწაზე. გასხურებთ განმწმენდელ წყალს და გაგწმენდთ ყოველი უწმინდურებისგან და ყოველი თქვენი კერპისგან გაგწმენდთ თქვენ.