მთელი ცხოვრება ვიღვწით, ვშრომობთ და ვაშენებთ ღირსეულ წარმოდგენებს საკუთარ თავზე, ვუფრთხილდებით რეპუტაციას და სწორად სიარულს ვცდილობთ, თუმცა ერთ დღესაც, შესაძლოა, ჩვენმა პრინციპებმა და შეკოწიწებულმა ღირებულებებმა მარცხი განიცადოს, ეს მტკივნეულია და ზოგჯერ იმდენად, რომ ადამიანებს ცხოვრების გაგრძელება უჭირთ, საკუთარ თავს ვერ პატიობენ და წარსულსა და მომავალს შორის გაჩერებულები აწმყოსაც კარგავენ.
ცხოვრებაში აბსოლუტურად ყველა ადამიანი დგება პატიების საჭიროების წინაშე, აბსოლუტურად ყველა, რადგან ადამის მოდგმა ვართ. თუ ახლა თვითგვემაში ცხოვრობ, თუ ეჭვი გეპარება, გაპატია ღმერთმა თუ არა, თუ წარმოსახვით სასწორზე საკუთარ და სხვათა ცოდვების სიმძიმეს წონი… თუ იუდასავით სიმშვიდე ვერ გიპოვია… უბრალოდ დააგდე ხელიდან „სასწორი“, კარი მიუხურე ეჭვებს და გაიხსენე, რომ ის ღმერთი გყავს, რომელზეც დავითი წერდა: „უკუნისამდეა წყალობა მისი!“ მიჰბაძე პეტრეს, რომელმაც ისევე უარყო იესო, როგორც იუდამ, მაგრამ მას უფლის მიტევებაში ეჭვი არ შეუტანია. თუ იმაზე ფიქრობ, იმსახურებ თუ არა პატიებას, მაშინ იცოდე, რომ ამას ვერც ვერასდროს დაიმსახურებ, რადგან პატიება მის წყალობაზეა დამოკიდებული და არა ჩვენს დამსახურებაზე, ის კი ნამდვილად „უკუნისამდე მწყალობელია.“ მიჰბაძე დავითს, რომელზეც უფალი ამბობს: „ჩემი გულის სანდომი კაცია ეს!“ იყავი წრფელი მონანიებისას და რწმენით აღსავსე მისი წყალობისადმი. გახსოვდეს, რომ ვისაც ბევრი ეპატია, უფრო მეტადაც უყვარს. აიღე უფლის სიტყვა და გამართე დაშვებული მკლავები, რადგან ღვთის სიტყვა არის ცოცხალი, მოქმედი და ორლესულ მახვილზე უფრო ბასრი და მას ჩვენი ცხოვრების შეცვლის უნარი შესწევს.
წყალობითა და პატიებით განიწმინდება ცოდვა და უფლის შიშით განუდგება კაცი სიავეს.
მე, მე ვარ ის, ვინც დანაშაულს ჩამოგბანს ჩემივე გულისთვის და შენს ცოდვებს არ გავიხსენებ. გამახსენე და ერთად განვსაჯოთ; შენ მოჰყევი, რათა გამართლდე.
რომელშიც გვაქვს გამოსყიდვა მისი სისხლით, ცოდვების მიტევება მისივე მადლის სიმდიდრით.
ცოდვებსა და ურჯულოებას აღარ გავუხსენებ.
ვინ არის შენი მსგავსი ღმერთი, დანაშაულს რომ პატიობს და აღარ უხსენებს ცოდვას თავისი სამკვიდროს ნატამალს? სამუდამოდ არ მრისხანებს იგი, რადგან სიკეთის მოყვარულია. კვლავ შეგვიბრალებს და ფეხქვეშ გათელავს ჩვენს დანაშაულს; ზღვის სიღრმეებში მოისვრი ყველა მათ ცოდვას.
რადგან მიმატოვა ჩემმა დედ-მამამ; მაგრამ უფალი მიმიღებს მე.
გამაგრდი და განმტკიცდი, ნუ შეგეშინდება და ნუ შეძრწუნდები მათ წინაშე, რადგან თავად უფალი, შენი ღმერთია შენთან; არ მოგშორდება და არ მიგატოვებს.