ფილმი, სახელად The Most Reluctant Convert, რომელიც მოგვითხრობს ისტორიას ცნობილი მწერლის, კლაივ ლუისის, ქრისტიანად გახდომის შესახებ, 2021 წლის გაზაფხულზე გამოვა კინოეკრანებზე.
ფილმში მოქმედება ვითარდება ოქსფორდში, სადაც ფილმის მთავარი გმირი თავად ხანში შესული პროფესორი ლუისია. ის იხსენებს თავის ახალგაზრდულ წლებს და გვიყვება იმის შესახებ, თუ როგორ მოექცა ათეიზმიდან ქრისტიანობაზე.
კლაივ ლუისის როლს ცნობილი მსახიობი მაქს მაკლინი განასახიერებს. ფილმის რეჟისორია ნორმან სტოუნი, რომელსაც მოგებული აქვს BAFTA — ბრიტანეთის აკადემიის კინოპრემია ფილმისთვის „Shadowlands“.
შეგახსენებთ, რომ კლაივ ს. ლუისი (1898-1963) ინგლისელი მწერალი გახლდათ. ცნობილია, როგორც მე-20 საუკუნის უდიდესი გავლენის მქონე ავტორი და აპოლოგეტი. იგი ქრისტიანული წესით იყო მონათლული, მაგრამ მოზარდობისას სარწმუნოებას ჩამოშორდა. დაახლოებით 30 წლის ასაკში ჯ. რ. რ. ტოლკინის და სხვა მეგობრების გავლენით იგი კვლავ დაუბრუნდა რელიგიას, რამაც გავლენა იქონია მის შემოქმედებაზე. ლუისის წიგნები გამოირჩევა რელიგიური მოტივების გავლენით. გარდა ამისა, იგი მონაწილეობდა რადიოგადაცემებში, სადაც ქვეყნის მასშტაბით საუბრობდა ქრისტიანობაზე. სხვა შესანიშნავ წიგნებთან ერთად მის კალამს ეკუთვნის ცნობილი წიგნი „ეს ქრისტიანობაა“, რომელშიც გადმოცემულია ავტორის შეხედულებანი ადამიანზე, ღმერთზე, მორალსა და რწმენაზე. მისი ცნობილი ნაწარმოების „ნარნიის ქრონიკების“ მიხედვით გადაღებულია ფილმები: „ლომი, ჯადოქარი და კარადა“ (2005), „უფლისწული კასპიანი“ (2008) და „განთიადის დამმორჩილებლის მოგზაურობა“ (2010). წიგნების ეს სერია ფენტეზისა და საბავშვო ლიტერატურის ზღვარზე მერყეობს. მასში მოთხრობილია ბავშვების მოგზაურობა ჯადოსნურ ქვეყანაში, სადაც ცხოველებს საუბარი შეუძლიათ, ხოლო ბოროტებას სიკეთე ებრძვის. ვინაიდან თავად მწერალი ქრისტიანული ლიტერატურის დიდი გავლენის ქვეშ იმყოფებოდა, რომანებში გვხვდება პარალელები ბიბლიურ მოტივებთან.