ცნობილმა სერიალმა, სახელწოდებით „რჩეული“ (The Chosen) უკვე მოიპოვა სრული დაფინანსება მე-3 სეზონის გადასაღებად. ახალ ეპიზოდებზე მუშაობას ისინი იანვრიდან დაიწყებენ.
„ეს სერიალი საუკეთესო გზაა იმისთვის, რომ ადამიანებმა უკეთ დაინახონ, თუ როგორი იყო იესო ქრისტეს ცხოვრება; დაინახონ ასევე, რომ იესოც ჩვეულებრივი ადამიანი გახლდათ, რომელიც ჭამდა, ცეკვავდა, იცინოდა…“ – ამბობს სერიალში ქრისტეს როლის შემსრულებელი იონათან რუმი.
შეგახსენებთ, რომ „რჩეული“ პირველი მრავალსერიანი სატელევიზიო პროგრამაა, რომელიც მთლიანად აღწერს იესოს ცხოვრებას. სერიალი გვიყვება ისტორიას ახალი აღთქმის იმ გმირების შესახებ, რომელთა ცხოვრებაც იესოსთან შეხვედრის შემდეგ სრულიად შეიცვალა. სერიალ „რჩეულთან“ ერთად მაყურებელი ხედავს ყოველ იმ ნაკლოვანებასა თუ შინაგან ბრძოლას პერსონაჟებში, რომელიც თქვენთვისაცაა დამახასიათებელი. ხედავთ, თუ როგორ ეძებდნენ ისინი მიზანს თავიანთ ცხოვრებაში ქრისტეს გამოჩენამდე, და ხედავთ, როგორ გარდაიქმნება მათი ცხოვრება ამის შემდგომ ქრისტეს მეშვეობით.
სერიალის პოპულარობამ გაუსწრო ყველა მანამდე არსებულ პროექტს, რომელიც ბიბლიისა და ქრისტიანული რწმენის შესახებ იყო გადაღებული. მისი სერიები 320 მილიონზე მეტჯერ იქნა ნანახი მთელ მსოფლიოში.
იმისათვის, რომ მოეგროვებინათ თანხა The Chosen-ისთვის, ფილმის წარმოების მზარდმა გუნდმა გადაწყვიტა, ესარგებლათ crowdfunding-ით. ეს არის ონლაინდაფინანსების ფორმა, რომელშიც პროექტით დაინტერესებულ პირებს შეუძლიათ აქციების ყიდვა. თანხის პირველი მოკრებისას, 2019 წელს, მათ 10 მილიონ დოლარზე მეტი მოაგროვეს 15 000-ზე მეტი აქციონერისგან.
ზემოხსენებული სერიალის პირველ სეზონს Movieguide Award-ის ორი ნომინაცია აქვს მოპოვებული.