„საქართველოს ევანგელური ალიანსი“ თავისი „ფეისბუკის“ ოფიციალურ გვერდზე „უცხოური გავლენის გამჭვირვალობის შესახებ“ კანონპროექტს ეხმაურება. ალიანსის მიერ ოფიციალურ განცხადებაში ნათქვამია:
„საქართველოს ევანგელურ ალიანსში შემავალ ევანგელურ ეკლესიებს გვსურს, გამოვეხმაუროთ საქართველოს პარლამენტში უმრავლესობის მიერ ინიცირებულ ‘უცხოური გავლენის შესახებ’ კანონპროექტს: მიგავჩნია, რომ აღნიშნული კანონპროექტი, თუ ის კანონად იქცევა, მკვეთრად ნეგატიურ გავლენას იქონიებს ჩვენს ქვეყანაზე. კანონპროექტის მიხედვით, თუ სამოქალაქო საზოგადოების ორგანიზაციების მთლიანი წლიური შემოსავლის 20%-ზე მეტის წყარო საქართველოს მოქალაქე ან საქართველოს კანონმდებლობის საფუძველზე დაფუძნებული იურიდიული პირი არ არის, ორგანიზაციას ევალება დარეგისტრირდეს, როგორც ‘უცხოური გავლენის აგენტი’, წინააღმდეგ შემთხვევაში დაჯარიმდება 25 000 ლარით. აღსანიშნავია ისიც, რომ სახელმწიფოსთვის ხელმისაწვდომი ხდება თანამშრომლების – ბენეფიციარების პერსონალური მონაცემები. საქართველოს ევანგელური ალიანსი აფიქსირებს მკვეთრად უარყოფით დამოკიდებულებას აღნიშნული კანონპროექტისადმი. მიგვაჩნია, რომ აღნიშნული კანონპროექტის კანონად ქცევა იმთავითვე გამოიწვევს საერთაშორისო თანამეგობრობის მიერ აღიარებულ რამდენიმე უფლების ერთდროულად დარღვევას, კერძოდ, გამოხატვის თავისუფლების, გაერთიანების თავისუფლების, რელიგიის თავისუფლების, პირადი ცხოვრების ხელშეუხებლობის შელახვას. კანონი დააზარალებს სამოქალაქო საზოგადოების ორგანიზაციების ბენეფიციარებს და მთლიანად საზოგადოებას. ჩვენი ქვეყანა იბრძვის საერთაშორისო თანამეგობრობაში საკუთარი ადგილის დასამკვიდრებლად, საქართველოს მოქალაქეების აბსოლუტური უმრავლესობის ურყევი ნებაა თავისუფალი, ტოლერანტული საზოგადოების განვითარება. აღნიშნული კანონპროექტი კი ეწინააღმდეგება ამ ხედვას და გვაბრუნებს ტოტალური კონტროლის სფეროში. გამომდინარე ყოველივე ზემოთ თქმულიდან, მივმართავთ საქართველოს პარლამენტს: შეწყდეს ‘უცხოური გავლენის შესახებ’ კანონპროექტის განხილვა და არ დაუშვათ, აღნიშნული კანონპროექტის კანონად ქცევა.“
ღმერთმა დალოცოს ჩვენი სამშობლო, საქართველო!