24 მარტს, საქართველოს მთავრობის ადმინისტრაციაში, რელიგიის საკითხთა სახელმწიფო სააგენტომ სოციალური პროექტის, ბრაილის შრიფტით დაბეჭდილი ძველი აღთქმის მეორე კანონიკური წიგნის, „გამოსვლა“, პრეზენტაცია გამართა, რომელსაც საქართველოში არსებული რელიგიური ორგანიზაციების ლიდერები, საქართველოს უსინათლოთა კავშირის წარმომადგენლები, უსინათლო და მხედველობადაქვეითებულთა 202-ე საჯარო სკოლა-პანსიონის წარმომადგენლები დაესწრნენ.
ზაზა ვაშაყმაძის თქმით, სააგენტო ეცდება, დააკმაყოფილოს უსინათლოთა საზოგადოების წარმომადგენელთა თხოვნა და ბიბლიის შემდეგი წიგნების გამოცემა დაჩქარდეს.
შარშან რელიგიის სააგენტომ გამოსცა ბიბლიის პირველი წიგნი – „დაბადება“. წიგნი „გამოსვლა“ კი ძველი აღთქმის ხუთწიგნეულისა და ბიბლიის მეორე კანონიკური წიგნია, რომელიც ებრაელი ხალხის ეგვიპტეში ტყვეობიდან დახსნის ამბავს მოგვითხრობს.
შეგახსენებთ, რომ სააგენტო მეოთხე წელია, ახორციელებს სოციალურ პროექტს – ბრაილის შრიფტით ბეჭდავს ინტერრელიგიურ კალენდარს. ბიბლიის ბრაილის შრიფტით დაბეჭდვის იდეა უსინათლო ბავშვებს უკავშირდებათ. გამოკითხვის თანახმად, უსინათლო და მხედველობადაქვეითებულმა ბავშვებმა სწორედ ბიბლიის ბრაილის შრიფტით წაკითხვის სურვილი გამოთქვეს.