რელიგიის საკითხთა სახელმწიფო სააგენტომ რელიგიურ გაერთიანებებს საბჭოთა ტოტალიტარული რეჟიმის დროს მიყენებული ზიანის ნაწილობრივი ანაზღაურების უზრუნველყოფის მიზნით, 2021 წლის სახელმწიფო ბიუჯეტით განსაზღვრული 4 500 000 ლარიდან ამ ეტაპზე გაუნაწილა 3 500 000 ლარი შემდეგი ოდენობებით:
საქართველოს ისლამურ თემს – 2 200 000 (ორი მილიონ ორასი ათასი) ლარი;
საქართველოს სომეხთა სამოციქულო ქრისტიანულ თემს – 600 000 (ექვსასი ათასი) ლარი;
საქართველოს რომაულ-კათოლიკეთა ქრისტიანულ თემს – 400 000 (ოთხასი ათასი) ლარი;
საქართველოს იუდეურ თემს – 300 000 (სამასი ათასი) ლარი;
2021 წლისთვის დარჩენილი 1 000 000 (ერთი მილიონი) ლარი განაწილდება მოგვიანებით.
2014 წლიდან სახელმწიფომ დაიწყო დამატებით ოთხი რელიგიური ორგანიზაციის სახელმწიფო დაფინანსებაც. „რელიგიური გაერთიანებებისათვის საბჭოთა ტოტალიტარული რეჟიმის დროს მიყენებული ზიანის ნაწილობრივ ანაზღაურებასთან დაკავშირებული ზოგიერთი ღონისძიების განხორციელების წესის დამტკიცების თაობაზე“ საქართველოს მთავრობის 2014 წლის 27 იანვრის (#117) დადგენილების საფუძველზე, მუსლიმანურ, იუდეურ, რომაულ-კათოლიკურ და სომეხთა სამოციქულო ქრისტიანულ თემებს ზიანის ანაზღაურების მიზნით ყოველწლიურად გამოეყოფა დაფინანსება. აღნიშნული ცვლილება მთავრობამ შეაფასა, როგორც რელიგიური გაერთიანებების თანასწორუფლებიანობის დაცვისკენ წინ გადადგმული ნაბიჯი, თუმცა, რეალურად, დაფინანსების ეს მოდელი კონფესიათა დისკრიმინაციული შერჩევის კრიტერიუმებს დაეფუძნა და არსებული უთანასწორობა ვერ აღმოფხვრა. საქართველოს საპატრიარქოსგან განსხვავებით, რომლის დაფინანსებასაც სახელმწიფო კონსტიტუციური შეთანხმების საფუძველზე ამართლებს, სრულიად განსხვავებულია სახელმწიფოს პოლიტიკა ოთხი რელიგიური თემისთვის გამოყოფილი თანხების გაკონტროლებისა და ანგარიშვალდებულების ნაწილში. სახელმწიფო არ ამოწმებს, თუ როგორ იხარჯება მართლმადიდებელი ეკლესიისთვის გამოყოფილი ფინანსური სახსრები, თუმცა აკონტროლებს ოთხი რელიგიური გაერთიანებისთვის „სიმბოლური კომპენსაციის“ სახით გადაცემულ თანხებს.
აღსანიშნავია, რომ 2014 წლის 27 იანვრის დადგენილება არ ითვალისწინებს სამართლიან და ობიექტურად გაზომვად კრიტერიუმებს, რომელსაც მთავრობა ეყრდნობა კომპენსაციის ოდენობის დადგენის დროს. კანონით გათვალისწინებული კრიტერიუმების არარსებობის პირობებში, პრაქტიკაში, სააგენტოს მიერ გამოყენებული ზიანის ანაზღაურების დაანგარიშების კრიტერიუმების შეფასება ასევე ადასტურებს, რომ ის არ არის რაიმე ფორმით დაკავშირებული ადრესატი რელიგიური გაერთიანებებისთვის წარსულში მიყენებული ზიანის მოცულობასა და მის შედეგთან.