„უმეტესობა მართლმადიდებელია და 6 იანვრის ღამეს შეზღუდვა ამიტომ მოვხსენით.“ – განაცხადა 27 ნოემბერს მედიასთან ვიცე-პრემიერმა ცქიტიშვილმა მთავრობის მიერ გადაადგილებაზე მხოლოდ 6 იანვარს შეზღუდვის მოხსნის შესახებ.
რელიგიური გაერთიანებები პრემიერ-მინისტრის, გიორგი გახარიასა და ვიცე-პრემიერის, მაია ცქიტიშვილის განცხადებას ეხმაურებიან და ვრცელ განცხადებას აქვეყნებენ, რომელსაც ხელს 11 რელიგიური სუბიექტი აწერს. ისინი მიიჩნევენ, რომ ხელისუფლების მხრიდან, რელიგიური კონფესიების მიმართ გადაიდგა დისკრიმინაციული ნაბიჯები.
„პანდემიასთან ბრძოლის დაწყებისას, 2020 წლის 14 აპრილს, საერთო შეშფოთება გამოიწვია საქართველოს პრემიერის, გიორგი გახარიას კომენტარმა, რომლის თანახმად, საგანგებო სიტუაციის დროს, დომინანტური რელიგიური გაერთიანებისთვის გათვალისწინებული განსხვავებული რეჟიმი საქართველოს სახელმწიფოს კონფესიურ ხასიათს ეფუძნება იმას, რომ, მისივე თქმით, ‘ჩვენ მართლმადიდებლური სახელმწიფო ვართ’. პრემიერ-მინისტრის ძირეულად მცდარი განცხადება, რასაკვირველია, საქართველოს კონსტიტუციასა და სახელმწიფო მოწყობის ხასიათს ეწინააღმდეგებოდა – საქართველოს კონსტიტუციით რელიგია და სახელმწიფო ურთიერთგამიჯნულია, ხოლო რელიგიური ნიშნით უთანასწორო მოპყრობა – აკრძალული. მაგრამ მაშინ ხსენებულ კომენტარს არ გამოვხმაურებივართ, ვინაიდან მძიმე და დაძაბული დღეების გამო, უნებლიე შეცდომად მივიჩნიეთ. თუმცა შეიძლება სინანულით ითქვას, რომ ქალბატონ მაია ცქიტიშვილის პოზიცია, წინარე გამოცდილების გათვალისწინებით და მთავრობის მიერ შემუშავებული მიმდინარე შეზღუდვების მიხედვით თუ ვიმსჯელებთ, ახლა უკვე გამოკვეთილად დისკრიმინაციული დამოკიდებულების შესახებ მეტყველებს...
ხელმომწერი რელიგიური გაერთიანებები მაღალი სოციალური პასუხისმგებლობით ვეკიდებით პანდემიასთან საერთო ეროვნულ ბრძოლას; ჩვენ კარგად გვესმის და გაცნობიერებული გვაქვს, რამდენად ვერაგ დაავადებასთან გვაქვს საქმე, რამდენად მნიშვნელოვანია მასთან გამკლავების პროცესში მთელი მოსახლეობის კონსოლიდაცია. მით უფრო ხელისუფლების მხრიდან გადადგმული ნაბიჯები არ უნდა იწვევდეს მწვავე უსამართლობის განცდას, არ უნდა ატარებდეს დისკრიმინაციულ ხასიათს. ჩვენ არ მივიღებთ ხელისუფლების პოზიციას იმასთან დაკავშირებით, რომ უმცირესობაში ყოფნა შეიძლება იყოს დაკნინებისა და უთანასწორო მოპყრობის საფუძვლად გამოცხადებული. ჩვენ, რელიგიური განსხვავების მიუხედავად, თანასწორნი ვართ კანონის წინაშე, თანასწორობის პრინციპი საქართველოს კონსტიტუციითაა დაცული!
მოვუწოდებთ საქართველოს ხელისუფლებას, პანდემიასთან ბრძოლის ფონზე, არ დაუშვას დისკრიმინაციული დამოკიდებულების გამოვლინება დომინანტურისგან განსხვავებული რელიგიური გაერთიანებებისადმი და ამ ნიშნით არ შელახოს რელიგიის თავისუფლება. ასევე მოვუწოდებთ საქართველოს ხელისუფლებას, ყველაფერი იღონოს საიმისოდ, რომ არ შეგვექმნას დაბრკოლება სოციალური და საქველმოქმედო მსახურების პროცესში. მზად ვართ ამ, და ზოგადად, პანდემიასთან დაკავშირებული სხვა საკითხების განსახილველად შევხვდეთ საქართველოს ხელისუფლებას.“ – ნათქვამია განცხადებაში.
განცხადებას ხელს აწერენ:
1. ქართველ მუსლიმანთა კავშირი
2. სრულიად საქართველოს მუსლიმანთა უმაღლესი სასულიერო სამმართველო
3. ევანგელისტური ეკლესია
4. ევანგელურ-ბაპტისტური ეკლესია
5. სახარების რწმენის ეკლესია
6. აჰმადია – მუსლიმანთა გაერთიანება
7. ევანგელური ეკლესია „სიცოცხლის სიტყვა“
8. მეგობართა საზოგადოება – კვაკერები
9. სვედენბორგის რელიგიური საზოგადოება
10. დახსნილ ქრისტიანთა საღვთო ეკლესია
11. „ხსნის არმია“
შეგახსენებთ, რომ ქვეყანაში კომენდანტის საათი 28 ნოემბრიდან 31 იანვრამდე საღამოს 21:00 საათიდან დაიწყება და დილის 05:00 საათამდე გაგრძელდება.
ამ დროის განმავლობაში იკრძალება ადამიანების მოძრაობა როგორც ქვეითად, ისე სატრანსპორტო საშუალებით, ასევე საჯარო სივრცეში ყოფნა. გამონაკლისი იქნება 31 დეკემბრის და 6 იანვრის ღამე.