„საქართველოს ევანგელური ალიანსი“ საკუთარი „ფეისბუკის“ გვერდზე უკრაინაში მიმდინარე მოვლენებს, კერძოდ, ბუჩადან გავრცელებულ კადრებს ეხმაურება და ოფიციალურ განცხადებას ავრცელებს:
„ჩვენ, საქართველოს ევანგელური ალიანსი, ძალიან დიდი გულისტკივილით ვადევნებთ თვალს ბუჩაში, ხარკოვში, მარიუპოლში, ჰოსტომელსა და უკრაინის სხვა ქალაქებსა თუ სოფლებში განვითარებულ ტრაგიკულ მოვლენებს. ძნელია სიტყვების პოვნა იმ არაადამიანური სისასტიკის აღსაწერად, რაც მასობრივი ინფორმაციის საშუალებებით ვიხილეთ და მოვისმინეთ. გვსურს, გამოვხატოთ დიდი წუხილი და თანაგრძნობა ჩვენი სულიერი ძმების, დების და სრულიად უკრაინელი ხალხის მიმართ.
ის, რაც უკრაინაში, კერძოდ კი, ქალაქ ბუჩაში მოხდა, არის კაცთმოძულეობისა და უღმერთოების ამაზრზენი დანაშაული, რომელსაც ახორციელებს რუსეთის ფედერაცია მშვიდობიანი ქვეყნის ტერიტორიაზე. იმედს გამოვთქვამთ, რომ საერთაშორისო სამართლის ინსტიტუტები შეძლებენ ყველა ამ საშინელების გამოძიებას და ყველაფრის სამართლებრივად შეფასებას. ყოვლად გაუმართლებელი საომარი მოქმედებების შედეგად უამრავი მშვიდობიანი მოქალაქე, მათ შორის ქალები, ბავშვები და მოხუცები არიან მხეცურად ნაწამებნი და დახოცილები. სამწუხაროდ, მსგავსი ფაქტები ფიქსირდება უკრაინის ბევრ სხვა ქალაქში.
საქართველოს ევანგელური ალიანსის წევრი ეკლესიები ვცდილობთ, ჩვენი მოკრძალებული წვლილი შევიტანოთ უსამართლოდ დევნილი და ტანჯული უკრაინელი ხალხის დახმარების საქმეში. ამ საქველმოქმედო მიზნით, ჩვენ დახმარებას ვუწევთ როგორც უკრაინაში დარჩენილებს, ასევე საქართველოში ჩამოსულ დევნილებს.
ცხადია, რომ რისი გაკეთებაც არ უნდა შევძლოთ ყველამ, ეს იქნება ძალიან ცოტა, თუ ბოროტება არ იქნება შეჩერებული და დროულად აღკვეთილი. ამიტომ, კიდევ ერთხელ მოვუწოდებთ მსოფლიო თანამეგობრობას, უფლებადამცველ ორგანიზაციებსა და რელიგიურ გაერთიანებებს, ყველაფერი გააკეთონ იმისათვის, რომ საომარი მოქმედებები შეწყდეს და უკრაინაში კვლავ მშვიდობამ დაისადგუროს. ალიანსი სოლიდარობას უცხადებს თავისუფლებისათვის მებრძოლ უკრაინელ ხალხს და ღმერთს სთხოვს, რომ მან დალოცოს და დაიფაროს უკრაინა.“