ქრისტიანული ჰუმანიტარული ორგანიზაციის „სამარიტელის ქისის“ პრეზიდენტი და ცნობილი ევანგელისტი მქადაგებელი ფრანკლინ გრემი უკრაინაში იმყოფება, საიდანაც 17 აპრილს თავისი სააღდგომო გზავნილით მიმართავს მსოფლიოს. გრემი უკრაინაში ასევე იმყოფებოდა 27 მარტსაც, სადაც საკუთარი გუნდის მოსანახულებლად ჩავიდა. „სამარიტელის ქისას“ უკრაინაში რამდენიმე საველე ჰოსპიტალი აქვს მოწყობილი და 160 ადამიანი ჰყავს გაგზავნილი ომისგან დაზარალებულთა დასახმარებლად.
ფრანკლინ გრემი მთელი მსოფლიოს ქრისტიანებს მოუწოდებს, რომ შეუერთდნენ უკრაინისთვის ლოცვის მარათონში 15-დან 24 აპრილის ჩათვლით.
„ბოლო რამდენიმე დღეა, რაც უკრაინაში ვიმყოფები ჩვენი ჯგუფის და მათი საქმიანობის მონახულების მიზნით. პაციენტთა რაოდენობა ჩვენს საველე ჰოსპიტლებში გაიზარდა ლვოვსა და სხვა ხუთ ამბულატორიულ კლინიკაში. ბევრი პაციენტი, რომელსაც ჩვენი გუნდი მკურნალობს, იძულებით გადაადგილებული პირია. უამრავ მათგანს მედიკამენტების გარეშე მოუწია გაქცევა; ან შეძლეს მათი წაღება, მაგრამ მარაგი ამოეწურათ; ამ ადამიანების ჯანმრთელობის მდგომარეობა უარესდება და საჭიროა მათი დახმარება.
ჩვენი გუნდი ასევე მკურნალობს უშუალოდ საბრძოლო მოქმედებებთან დაკავშირებულ დაზიანებებს. გუშინ, ჩემი იქ ყოფნის პერიოდში, ერთ ახალგაზრდა კაცს ჰქონდა თიაქარი და, საბედნიეროდ, ჩვენმა გუნდმა შეძლო ოპერაციის წარმატებით ჩატარება. იმის მიუხედავად, რომ შემდგომ მას სჭირდებოდა პოსტოპერაციული რეაბილიტაცია, უნდოდა, რაც შეიძლება მალე დაჰბრუნებოდა თავის პოზიციას და დაეცვა თავისი ქვეყანა. ეს ბევრ რამეზე მეტყველებს.
საჰაერო განგაშის სირენები ყოველღამე ირთვება ლვოვში და ყველა ვალდებულია, ისეთ უსაფრთხო ადგილს შეაფაროს თავი, როგორიცაა სარდაფები და ბომბის თავშესაფრები, სანამ სირენების ხმა არ შეწყდება. ჩემი ქალიშვილი ცისიც ჩემთან ერთადაა და ჩვენ ამ დილით შევხვდით ლვოვის მერს. ვარაუდობენ, რომ მხოლოდ ლვოვში, დაახლოებით, მილიონი დევნილია. თითოეულ მათგანს აქვს გულისტკივილის, დანაკარგის და განადგურების საკუთარი ისტორია. მათ სახეებზე დიდი ტკივილი იკითხება. თვითმფრინავებით სავსე სამედიცინო დახმარების გარდა, „სამარიტელის ქისა“ ასევე ყიდულობს და უზრუნველყოფს მილიონობით არამალფუჭებადი საკვების ტრანსპორტირებას. უკრაინელ ხალხს ჩვენი გამუდმებული ლოცვით დახმარება სჭირდება.“ – წერს ფრანკლინ გრემი თვის „ფეისბუკგვერდზე“.
ფრანკლინ გრემის სააღდგომო მიმართვა პირდაპირ ეთერში ამერიკულ არხ „Fox News“-ზე გავა. შეგახსენებთ, რომ მსოფლიო ქრისტიანთა დიდი ნაწილი წელს აღდგომას 17 აპრილს აღნიშნავს.