კომპანია Sony Pictures-მა ცოტა ხნის წინ განაცხადა იმის შესახებ, რომ აპირებს ქრისტიანული პლატფორმის, Pure flix-ის ვიდეოთეკის კატალოგის შეძენას.
ცნობილია, რომ AFFIRM Entertainment-ი Sony-ის შვილობილი კომპანიაა და სწორედ მათ დადეს ხელშეკრულება ქრისტიანულ პლატფორმასთან. გარიგება მარეგულირებელი ორგანოების დასტურის შემდეგ შევა ძალაში, რის შემდეგაც Sony Pictures-ი გახდება Pure flix-ის სატელევიზიო სერვისის (SVOD) მფლობელი.
Affirm Films-ი ცნობილია თავისი შთამაგონებელი სახის კონტენტით. მას ეკუთვნის ისეთი ქრისტიანული ფილმები, როგორებიცაა: „ომის ოთახი“, „ზეცა რეალურია“ და „სასწაული ზეციდან“.
„Pure Flix-ი კარგად ერგება ჩვენს ბრენდს, რომელიც ცნობილია თავისი მაღალი ხარისხით და შთამაგონებელი შინაარსით. ჩვენ გვიყვარს ისეთი პროდუქციის შექმნა, რომელიც გავლენას ახდენს ადამიანთა ცხოვრებაზე. Pure Flix-მა საოცარი საქმე გააკეთა, გარშემო საოცარად ერთგული აუდიტორია შემოიკრიბა და ჩვენ ველით, რომ გავაგრძელებთ ამ აუდიტორიის გაოცებას და გავახარებთ მათ ქრისტიანული ფასეულობების მქონე ფილმების მიწოდებით.“ – განმარტა Sony-ს ქსელებისა და დისტრიბუციის პრეზიდენტმა კიტ ლე გომ.
„უკვე 15 წელია, ვშრომობთ იმისთვის, რომ ოჯახებში ქრისტიანული რწმენა და იმედი შევიტანოთ. ვფიქრობთ, AFFIRM Entertainment-თან ამ შეთანხმებით ჩვენ ერთობლივად შევძლებთ, უფრო ფართო აუდიტორიას მივწვდეთ.“ – განაცხადა Pure Flix-ის აღმასრულებელმა დირექტორმა მაიკლ სკოტმა.
შეგახსენებთ, რომ კორონა ვირუსის პანდემიის შემდეგ, Pure Flix-ის გამომწერთა რაოდენობა 40%-ით გაიზარდა. მისი აბონენტები თვეში 12,99 დოლარს იხდიან, თუმცა უცნობია, შეიცვლება თუ არა ეს ფასი, როდესაც სერვისს Sony შეიძენს.