ორი სტუდენტის საქმეს სიტყვის თავისუფლების დარღვევასთან დაკავშირებით, აშშ-ის უზენაესი სასამართლო ოქტომბერში განიხილავს. სტუდენტებს კოლეჯის ტერიტორიაზე ქრისტიანობის ქადაგება შეუზღუდეს. ისინი სიტყვის თავისუფლებისთვის იბრძვიან. ეს საქმე ერთგვარი პრეცედენტი გახლავთ სხვა ადამიანებისთვის, რომლებიც რელიგიური დისკრიმინაციის მსხვერპლნი არიან და რომელთაც უკრძალავენ საკუთარი შეხედულებების გამოთქმას გარკვეულ ადგილებში იმ მოტივით, რომ მათ შეხედულებებს რელიგიური საფუძველი აქვს.
ჩაიკ უზუგბუნამი მესამე კურსის სტუდენტი იყო ჯორჯიის გვინეტის კოლეჯში 2016 წელს, როდესაც დავა დაიწყო. ლორენსვილის სკოლის კამპუსში ის სტუდენტებს ბროშურებს ურიგებდა, სადაც განმარტებული იყო ქრისტიანული რწმენის შესახებ.
კამპუსის ხელმძღვანელებმა გააჩერეს იგი და უთხრეს, რომ მას სამი დღით ადრე უნდა აეღო ნებართვა ამისათვის და კამპუსის ტერიტორიაზე არსებული ორი მონაკვეთი უნდა გამოეყენებინა, სადაც ვრცელდებოდა სიტყვის თავისუფლება. უზუგბუნამმა მოიპოვა ნებართვა იმისათვის, რომ ელაპარაკა ერთ-ერთ თავისუფალ ზონაში. მიუხედავად ამისა, საჩივრის გამო კამპუსის ხელმძღვანელებმა მას მაინც შეაწყვეტინეს ქადაგება.
„კოლეჯის ხელმძღვანელებს სინამდვილეში არ აღელვებთ, სად ვდგავარ; მათ უბრალოდ არ მოსწონთ ის, რასაც ვამბობ.“ – განაცხადა უზუგბუნამმა Atlanta News Now-ის ინფორმაციით.
მეორე სტუდენტს, ჯოზეფ ბრედფორდსაც სურდა სახარების ქადაგება კამპუსის ტერიტორიაზე და უზუგბუნამთან ერთად საჩივარი შეიტანა სასამართლოში. ორი წლის შემდეგ, აშშ-ის საოლქო მოსამართლემ, ელეონორ როსმა შეწყვიტა საქმის განხილვა. მისი განცხადებით, კოლეჯმა უკვე მოაგვარა ეს საკითხი სტუდენტებისთვის, პროფესორებისა და სტუმარი სპიკერებისთვის სიტყვის თავისუფლების უზრუნველმყოფი პოლიტიკის შემოღებით.
მიუხედავად ამისა, ქრისტიანული ორგანიზაცია Alliance Defending Freedom, რომელიც ორი ყოფილი სტუდენტის წარმომადგენელია, მიიჩნევს, რომ საქმის განხილვის შეწყვეტა კოლეჯს აძლევს საშუალებას, თავიდან აირიდოს პასუხისგება, რითიც საშიშ პრეცედენტს ქმნის.
„როდესაც მთავრობის ოფიციალური პირები არღვევენ ადამიანებისთვის კონსტიტუციით მინიჭებულ უფლებებს, ამან, შესაძლოა, დიდი ზიანი მიაყენოს მსხვერპლს.“ – აცხადებს ორგანიზაციის მთავარი იურიდიული მრჩეველი კრისტენ ვაგონერი.
უზენაესი სასამართლოს შეკრება ოქტომბერშია დაგეგმილი.