16 ნოემბერს მსოფლიო ტოლერანტობის საერთაშორისო დღეს აღნიშნავს. ეს დღე 1995 წლიდან UNESCO-ს ინიციატივით აღინიშნება და მისი მიზანი არატოლერანტობისა და დისკრიმინაციის საფრთხეებზე საზოგადოების ცნობიერების ამაღლებაა.
ტოლერანტობის პრინციპთა დეკლარაციის თანახმად, რომელსაც 1995 წლის 16 ნოემბერს პარიზში UNESCO-ს ინიციატივით „გაეროს“ წევრმა სახელმწიფოებმა მოაწერეს ხელი, ტოლერანტობა ,,მსოფლიოს კულტურათა მდიდარი მრავალფეროვნების, თვითგამოხატვის ფორმებისა და ადამიანის ინდივიდუალობის გამოვლინების შესაძლებლობათა პატივისცემა, მიღება და მართებული გაგებაა. მას ხელს უწყობს ცოდნა, ღიაობა, ურთიერთობა და აზრის, სინდისისა და შეხედულებათა თავისუფლება. ტოლერანტობა – ესაა თავისუფლება მრავალფეროვნებაში. ეს არის არა მარტო მორალური ვალი, არამედ პოლიტიკური და სამართლებრივი მოთხოვნილებაც. ტოლერანტობა სათნოებაა, რომელიც შესაძლებელს ხდის მშვიდობას და ომის კულტურის მშვიდობის კულტურით შეცვლაში გვეხმარება.”
„საქართველო, მსოფლიო საზოგადოებასთან ერთად, აღნიშნავს ტოლერანტობის საერთაშორისო დღეს, რაც კიდევ ერთხელ დასტურია იმისა, რომ ადამიანი, მისი ღირსება და უფლებები კაცობრიობისთვის უმთავრესი ღირებულებაა. ჩვენი ქვეყნის თითოეულ მოქალაქეს, სრულიად საქართველოს საზოგადოებას ვულოცავ ტოლერანტობის საერთაშორისო დღეს! გისურვებთ სიკეთეს, სიყვარულს და ურთიერთპატივისცემას.“ – ნათქვამია საქართველოს პრემიერ-მინისტრის, ირაკლი ღარიბაშვილის, განცხადებაში.
შერიგებისა და სამოქალაქო თანასწორობის საკითხებში სახელმწიფო მინისტრის აპარატმა ტოლერანტობის საერთაშორისო დღესთან დაკავშირებით თემატური სამწუთიანი ვიდეორგოლი მოამზადა.
ვიდეოს მიზანია ჩვენი ქვეყნის ეთნიკური და კულტურული მრავალფეროვნების წარმოჩენა, სამოქალაქო ინტეგრაციისა და თანასწორობის პოლიტიკის პრიორიტეტების ხაზგასმა და რაც მთავარია, ტოლერანტული განწყობის წახალისება, განმტკიცება და პოპულარიზაცია.
ვიდეორგოლში მონაწილეობენ სხვადასხვა პროფესიის მქონე ადამიანები.
ტოლერანტობის საერთაშორისო დღე, „გაეროს“ გადაწყვეტილებით, 1996 წლიდან აღინიშნება.