ჭეშმარიტი ქრისტიანები პოლიტიკურად არაკორექტულნი არიან, რადგანაც, როდესაც საქმე ეხება ჭეშმარიტებას, ისინი არატოლერანტულობას იჩენენ. ერთხელ ვიღაცამ მითხრა, რომ მას არ მოსწონს ქრისტიანობა, რადგან ის ზედმეტად „გონებაშეზღუდულია“. ადამიანები ამბობენ, რომ ღმერთამდე მრავალი გზა მიდის და რომ თითოეულ ადამიანს, შესაძლოა, თავისი სიმართლე ჰქონდეს, მაგრამ მოდით, ვცადოთ ამ თეორიის შემოწმება.
შეიძლება თუ არა 1+1=3? მგონი, მე ძალიან გონებაშეზღუდული გამომთვლელი მაქვს, რადგან ის გამუდმებით მიჩვენებს იმას, რომ 1+1=2, მაგრამ ნუთუ ჩემი გამომთვლელი იმიტომ არის შეზღუდული, რომ ეზიზღება ციფრი 2? არა, ჩემო მეგობარო, ის შეზღუდულია იმიტომ, რომ ჭეშმარიტება ბუნებით ვიწროა, აი, სიცრუე კი − პირიქით. მე თუ დავსვამ კითხვას: რამდენი იქნება1+1? მრავალი პასუხი შეიძლება მივიღო, მაგრამ მხოლოდ ერთი პასუხი იქნება სწორი.
მათეს სახარებაში (7:13-14) ნათქვამია: „შედით ვიწრო კარიბჭით, ვინაიდან ფართოა კარიბჭე და განიერია გზა, რომელსაც დაღუპვისაკენ მიჰყავს, და მრავალნი დადიან მასზე. ვინაიდან ვიწროა კარიბჭე და ვიწროა გზა, რომელსაც სიცოცხლისაკენ მიჰყავს, და მცირედნი პოვებენ მას.“
არსებობს უთვალავი არასწორი გზა და ყოველი ადამიანი თავის გზაზე დადის. აი, ამიტომ არის დაღუპვის გზა ფართო. არსებობს მხოლოდ ერთი სწორი გზა. ის ვიწროა, რადგან უნიკალურია. იესოს რომ დიდი და წარმატებული რელიგიისათვის საფუძვლის ჩაყრის სურვილი ჰქონოდა, ის უთუოდ უფრო ფართოს გახდიდა გზას, მაგრამ ქრისტე არ ყოფილა დიდი კონვეიერის გაკეთების მოსურნე. ის არის „გზა, ჭეშმარიტება და სიცოცხლე“. მისი სიტყვები არ იყო მარკეტინგული სვლა. მისი სიტყვები ჭეშმარიტება იყო.
იესო არის კარი და არ არსებობს სხვა კარი. სახარება ვიწროა არა იმიტომ, რომ ღმერთი სასტიკი ან მიკერძოებულია. სახარება ვიწროა, რადგან ის არის ჭეშმარიტება, რომელიც გათავისუფლებს.
სხვაში არავისში არ არსებობს ხსნა, არც არის ცის ქვეშ ხალხისათვის მიცემული სხვა სახელი, რომლითაც გადავრჩებით.