2007 წელს აშშ-ში დაწყებული ყოველწლიური ლოცვითი კამპანია „40 დღე სიცოცხლისათვის“, უკვე მსოფლიოს სხვადასხვა ქალაქებს მისწვდა და პანდემიის გამო დაწესებულ აკრძალვათა მიუხედავად, როგორც ჩანს, წელს რეკორდს მოხსნის მონაწილეთა რაოდენობის მიხედვით. 40 დღის განმავლობაში კამპანიაში მონაწილეები შეიკრიბებიან იმ კლინიკებთან, სადაც კეთდება აბორტები და ლოცვებს აღავლენენ. კამპანია 23 სექტემბერს დაიწყო და 1-ელ ნოემბერს დასრულდება.
შონ კარნიმ, არასამთავრობო ქრისტიანული ორგანიზაციის „40 დღე სიცოცხლისათვის“ პრეზიდენტმა და აღმასრულებელმა დირექტორმა გამოცემა The Christian Post-ს უთხრა, რომ წელს კამპანიაში 588 ქალაქი მონაწილეობს, რაც ყველაზე მაღალი მაჩვენებელია 2007 წლის შემდეგ.
„ბევრს ეგონა, რომ პანდემია და სამოქალაქო არეულობა ხელის შემშლელი ფაქტორი იქნებოდა, მაგრამ ძალიან ვამაყობ იმით, რომ ადგილობრივი ეკლესიების ლიდერებმა გამოთქვეს მზადყოფნა, რომ უხელმძღვანელონ ამ კამპანიას. მიუხედავად იმისა, რომ აბორტი უკვე თითქმის ხუთი ათეული წელია, ლეგალიზებულია, ქალებისა და დაუბადებელი ბავშვების დახმარების სურვილი ყოველთვის დიდია.“ – აცხადებს კარნი.
იმის მიუხედავად, რომ კამპანია „40 დღეს სიცოცხლისათვის“, ძირითადად, აშშ-სა და კანადაში ტარდება, ორგანიზაციის ვებგვერდზე არსებული მონაცემების მიხედვით, 2007 წლიდან მოყოლებული, კამპანიაში მონაწილეობა მიიღო 63 ქვეყნის ათასზე მეტმა ქალაქმა. შედეგად, სამსახური დატოვა აბორტების ჩატარებაში მონაწილე სამედიცინო პერსონალის 206-მა წარმომადგენელმა, დაიხურა 107 ცენტრი აბორტისა და გადარჩა 17 226 სიცოცხლე. ასევე, 2007 წლიდან ყოველწლიურ კამპანიებში მონაწილეობა მიიღო 20 ათასმა ეკლესიამ და მილიონზე მეტმა მოხალისემ.