ავღანეთმა ჩრდილოეთ კორეა ჩაანაცვლა პირველ ადგილზე და ქრისტიანებისათვის ყველაზე საშიში ქვეყანა გახდა მსოფლიოში, მას შემდეგ, რაც თალიბანმა ჩაიგდო ხელში ძალაუფლება 2021 წლის აგვისტოში. ორგანიზაცია Open Doors-ის მიხედვით, ავღანეთი N1-ლი ქვეყანაა, სადაც ქრისტიანები ყველაზე მეტად იდევნებიან. მას მოჰყვება ჩრდილოეთ კორეა, სომალი, ლიბია და იემენი. ქრისტიანთა დევნით გამოირჩევიან ასევე ირანი, ერაყი და ჩინეთი.
სიაში დასახელებულ ქვეყანათა უმრავლესობა სამხრეთ აზიასა და ჩრდილოეთ აფრიკაში მდებარეობს. ავღანეთმა პირველად გადაინაცვლა პირველ ადგილზე. მანამდე, წლების განმავლობაში, დევნის მხრივ ჩრდილოეთ კორეა ლიდერობდა.
ავღანეთში ქრისტიანული რწმენის ხმამაღლა აღიარება შეუძლებელია. ისლამზე უარის თქმა სირცხვილად მიიჩნევა, ხოლო ახალმოქცეული ქრისტიანები სასტიკი დევნის მსხვერპლნი ხდებიან. მათ ორი არჩევანი აქვთ: ან ქვეყანა უნდა დატოვონ, ან სიკვდილისთვის მოემზადონ. ასე იყო მანამდეც, სანამ ქვეყანაში მმართველობის სადავეებს თალიბანი ჩაიგდებდა ხელთ, თუმცა სიტუაცია ახლა კიდევ უფრო გაუარესდა. თალიბანს სურს, რომ ისლამურმა წეს-ჩვეულებებმა მტკიცედ გაიდგას ფესვი. ქრისტიანებიც იძულებულნი არიან, დაემორჩილონ ამ წესებს. იმ შემთხვევაში, თუ რომელიმე ადამიანის ქრისტიანული რწმენის შესახებ გამჟღავნდება, ოჯახის წევრები, ტომი თუ კლანი ვალდებულნი არიან, გააძევონ იგი ან სიკვდილით დასაჯონ. გარდა ამისა, იმის გამო, რომ ისლამზე უარის თქმა სიგიჟედ მიიჩნევა, ქრისტიანობაზე მოქცეულები შესაძლოა ფსიქიატრიულ საავადმყოფოში მოათავსონ.
Open Doors-ის პრეზიდენტმა და აღმასრულებელმა დირექტორმა, დევიდ კერიმ, Christian Headlines-ს განუცხადა, რომ ეს ორგანიზაციის ანგარიშების ისტორიაში ყველაზე „მკვეთრი ცვლილებაა“, რადგან ჩრდილოეთ კორეა იმიტომ კი არ გადასულა მეორე ადგილზე, რომ მდგომარეობა გაუმჯობესდა, პირიქით, ავღანეთში გაუარესდა სიტუაცია.
„ავღანეთში ქრისტიანისთვის შეუძლებელია საკუთარ რწმენაზე ხმამაღლა საუბარი.“ – ნათქვამია ანგარიშში.
„თალიბანის დაპირებები უფრო თავისუფალი საზოგადოების შექმნასთან დაკავშირებით, არ გამართლდა. დღეისათვის 4 მლნ ბავშვია სკოლის გარეშე დარჩენილი, მათგან 60% გოგონაა. დაპირება არ შესრულდა.“ – ამბობს დევიდ კერი.
კერის თქმით, „გადამწყვეტი ნაბიჯები“ უნდა გადაიდგას იმისათვის, რომ შეწყდეს „რელიგიური გენოციდი“ ქრისტიანების მიმართ. ორგანიზაციის ჩამონათვალში ბევრია ისეთი ქვეყანა, სადაც მთავრობები დაამხეს ექსტრემისტებმა და თავად მოვიდნენ სათავეში. ავღანეთი, სომალი, ერიტრეა და ლიბია ამის მაგალითებია.