ცნობილი მქადაგებელი, საერთაშორისო მსახურება „ASIM“-ის ხელმძღვანელი, აშშ-ში, ქალაქ საკრამენტოში რუსულენოვანი ეკლესიის („Дом Хлеба“) დამფუძნებელი და უფროსი ხუცესი, ალექსანდრე შევჩენკო 47 წლის ასაკში დაკავებულ პოზიციას ტოვებს.
მრავალრიცხოვანი ეკლესიის ახალი უფროსი ხუცესი ახალგაზრდა ღვთისმსახური, ედუარდ კისლიანკა იქნება. მსახურების გადაცემის ცერემონია 1-ელ აგვისტოსაა დაგეგმილი.
ხუცეს ალექსანდრეს გადაწყვეტილება მოულოდნელი აღმოჩნდა მრევლისთვის, თუმცა თავად „Дом Хлеба“-ში 17-წლიანი მსახურების შემდეგ ამბობს, რომ ყოველთვის იცოდა ამ დღის შესახებ. ის ემზადებოდა ესტაფეტის გადასაცემად და ლოცულობდა, რომ ღმერთს აერჩია ახალი ლიდერი. ეკლესიის სულიერ საბჭოსთან და ედუარდთან შეთანხმების შედეგად, მან 2020 წელს გადააბარა ახალ ლიდერს მართვის სადავეები და ამ დროის განმავლობაში ადმინისტრაციულ საქმეებში უმნიშვნელოდ იყო ჩართული. ერთი წლის შემდეგ კი მან უკვე ოფიციალურად განაცხადა, რომ ეკლესიის წინამძღოლობას ახალ ლიდერს გადასცემდა.
„ის, რამაც მე დამიდასტურა, რომ ამ პროცესის უკან ნამდვილად ღმერთი იდგა, იყო მომენტი, როდესაც ედუარდს ვკითხე, რას ფიქრობდა და როგორ ხედავდა თავს ამ როლში; მისი რეაქცია იმდენად მშვიდი და გაწონასწორებული იყო, რომ ამან ჩემშიც მშვიდობა მოიტანა. მან მითხრა: 'ყველაფერი ღმერთის ხელშია. ეს ღმერთის ეკლესიაა, რასაც ჩვენ ვასწავლით კიდეც მთელი 15 წლის განმავლობაში.‘“ – ამბობს შევჩენკო.
„მივედი იმ დასკვნამდე, რომ ეს ყველაფერი იყო ღმერთის ჩანაფიქრში. ეს იყო ღმერთის ნება არა მხოლოდ ეკლესიისთვის, არამედ ღმერთის ნება ჩემს ცხოვრებაშიც. ალექსანდრე ყოველთვის საუბრობდა ეკლესიაზე, ადამიანებზე, ხედვაზე. მისი გადაწყვეტილებები ყოველთვის ერთი რამის ირგვლივ ტრიალებდა, ის ყოველთვის ბევრს ფიქრობდა და საუბრობდა ადამიანებზე, ამიტომ მისი ეს გადაწყვეტილება ჩემთვის არ იყო მოულოდნელი და შოკის მომგვრელი.“ – განაცხადა ედუარდმა.
ალექსანდრე შევჩენკომ საკუთარ „ფეისბუკგვერდზე“ გამოაქვეყნა დოკუმენტური ფილმი „ესტაფეტის გადაცემა“, სადაც იგი დეტალურად აღწერს თავის გზას გადაწყვეტილების მიღებამდე და ამ გადაწყვეტილების მიზეზებზეც საუბრობს. ფილმში ეკლესიის სულიერი საბჭოს წევრები და ედუარდიც იღებენ მონაწილეობას. ეს ფილმი ერთგვარი ახსნა-განმარტება და დამშვიდობება იყო ეკლესიის წევრებისადმი უფროსი ხუცესის რანგში. რა თქმა უნდა, იგი კვლავ აპირებს, გააგრძელოს ღვთისადმი მსახურება მქადაგებლის მოწოდებაში.
როგორც ხუცესი ალექსანდრე ფილმში აღნიშნავს, მისი გადაწყვეტილების მთავარი მიზეზი ენობრივი ბარიერი და კულტურული მომენტები გახდა. ეკლესიის მრევლი, ძირითადად, ამერიკაში ემიგრირებული სლავური წარმოშობის ხალხია, რომელთა უმეტესობაც ამერიკაში გაიზარდა, ამას ემატება ახალგაზრდა თაობა, რომლებმაც აღარც მშობლიური ენა იციან და ამავდროულად, დასავლური კულტურის ნაწილად მიიჩნევენ თავს. ამიტომ ხუცესის აზრით, აუცილებელი იყო ლიდერის ცვლილება, რათა არ დაეკარგათ მომავალი თაობა და ეკლესია გაეხადათ უფრო მეტად მულტიკულტურული.
„ჩვენ უკვე 25 წელია, რაც ქორწინებაში ვიმყოფებით და ეს 25 წელი, ფაქტობრივად, ერთად ვმსახურობთ. ამ დროის განმავლობაში მე ვისწავლე ღმერთზე მინდობა და ვისწავლე მინდობა ჩემს მეუღლეზე. ჩვენ ამაზე მრავალი წლის განმავლობაში ვსაუბრობდით და ვიცოდით, რომ ეს მოხდებოდა. ეს არის განვითარების ბუნებრივი პროცესი ნებისმიერი ეთნიკური ჯგუფისთვის, რომელიც ემიგრაციაში იმყოფება.“ – ამბობს ალექსანდრე შევჩენკოს მეუღლე, ჟანა შევჩენკო.
შეგახსენებთ, რომ ალექსანდრე შევჩენკო მსოფლიოში ცნობილი მქადაგებელი, ღვთის სიტყვის მასწავლებელი, სპიკერი, რელიგიური ტელეპროგრამებისა და წიგნების ავტორია. 2005 წელს, კალიფორნიის შტატის ქალაქ საკრამენტოში, ალექსანდრე შევჩენკომ თავის მეუღლესთან, ჟანასთან ერთად დააარსა ეკლესია „Дом Хлеба“ (პურის სახლი), რომლის პირველი ღვთისმსახურებაც 2006 წლის 15 იანვარს ჩატარდა.