18 დეკემბერს არგენტინის პარლამენტის ქვედა პალატა დაეთანხმა აბორტის ლეგალიზების შესახებ კანონპროექტს. კანონპროექტი ქვეყნის პრეზიდენტის, ალბერტო ფერნანდესის შემოთავაზებულია და ჯერ კიდევ საჭიროებს სენატის მხრიდან დამტკიცებასა და მიღებას. პარლამენტის სენატის მიერ კანონპროექტის განხილვა კი წლის ბოლომდე უნდა მოხდეს.
კანონპროექტი ქალებს უფლებას აძლევს, შეწყვიტონ 14 კვირამდე ვადის ორსულობა. ქვედა პალატაში მას 131-მა დეპუტატმა დაუჭირა მხარი, 117 წინააღმდეგ გამოვიდა, ხოლო 6-მა თავი შეიკავა. დებატები ხუთშაბათიდან პარასკევ დილამდე გრძელდებოდა.
დემონსტრანტებმა, რომლებიც აბორტის ლეგალიზაციას უჭერენ მხარს, ღამე ბუენოს-აირესში კონგრესის შენობის წინ გაათენეს. მათ უმეტესობას მწვანე ფერის პირბადეები ეკეთა, რაც მათი მოძრაობის სიმბოლო გახდა. ისინი სიხარულით შეხვდნენ ეკრანზე პარლამენტის სპიკერის მიერ ხმის მიცემის შედეგების გამოცხადებას.
ამ სცენის კონტრასტული იყო პარლამენტის შენობიდან არცთუ ისე მოშორებით, სიცოცხლის მომხრეთა დემონსტრაცია. ღია ცისფერ მაისურებში ჩაცმული ასობით ადამიანი ეროვნული დროშებით ხელში, აპროტესტებდა ქვედა პალატის გადაწყვეტილებას.
საინტერესოა, რომ სენატში დებატების წინ კათოლიკურმა ეკლესიამ კანონმდებლებს მიმართა და სთხოვა მათ, ერთი წამით დაფიქრებულიყვნენ და გაეაზრებინათ, თუ რას ნიშნავს სიცოცხლის პატივისცემა. რომის პაპ ფრანცისკეს სამშობლოში კიდევ ერთხელ გაიმეორეს პაპის პოზიცია იმის თაობაზე, რომ აბორტი დღევანდელი „ერთჯერადი კულტურის“ ნაწილია.
მთავრობის თქმით, 1983 წლიდან მოყოლებული, არგენტინაში რამდენიმე ათასი ქალი გარდაიცვალა ფარული აბორტის პროცედურებისას და კიდევ დაახლოებით 38, 000 ქალის ჰოსპიტალიზაცია გახდა საჭირო ამის გამო. დეპუტატმა ოპოზიციიდან, გრასიელა კამანიომ აბორტების ლეგალიზაცია საზოგადოების პრობლემების გადაჭრის პოლიტიკურ უუნარობასთან გაათანაბრა.
„გამომწვევი მიზეზების: განათლების უკმარისობის, სიღარიბისა და ნაკლოვანებების მოგვარების ნაცვლად, ჩვენს მოქალაქეებს ვთავაზობთ ადვილ გამოსავალს, რომელიც სინამდვილეში პრობლემას არ აგვარებს და ამასთანავე, მამაკაცის, როგორც მომავალი მშობლის აზრს ამ გადაწყვეტილებაში არანაირად არ ვითვალისწინებთ.“ – განაცხადა მან.
აღსანიშნავია, რომ სენატმა ქვედა პალატის მიერ მიღებული აბორტის ლეგალიზების კანონპროექტი ერთხელ უკვე ჩააგდო ორი წლის წინ, წინა პრეზიდენტის მმართველობისას. ერთი წლის წინ კი, მოქმედმა პრეზიდენტმა არჩევნების ჩატარებამდე პირობა მისცა მოსახლეობას, რომ იბრძოლებდა იმისთვის, რომ აბორტი ნებაყოფლობითი და უფასო გამხდარიყო.
ახალი კანონის სრულ დამტკიცებამდე, არგენტინაში აბორტი მხოლოდ ორ შემთხვევაშია დაშვებული: გაუპატიურების შედეგად და იმ შემთხვევაში, თუკი დედის სიცოცხლეს საფრთხე ემუქრება.
შეგახსენებთ, რომ ლათინური ამერიკის ქვეყნების უმეტესობაში აბორტები აკრძალულია. კუბა, ურუგვაი და მექსიკის დედაქალაქი მეხიკო არიან იმ მცირე გამონაკლისთა შორის, სადაც ქალებს შეუძლიათ 12 კვირამდე ვადის ორსულობის შეწყვეტა.