აშშ-ის სამხედრო ძალებმა სპეცოპერაციის შედეგად გაათავისუფლეს ნიგერიაში გატაცებული ამერიკელი მისიონერი ფილიპე ნათან უოლტონი. 26 ოქტომბერს ექვსი შეიარაღებული პირი შეიჭრა უოლტონის სახლში და ფული მოითხოვა. ოჯახს 35 დოლარზე მეტი არ აღმოაჩნდა, რის შემდეგაც თავდამსხმელებმა უოლტონი გაიტაცეს. მისი ცოლი, ქალიშვილი და ცოლის ძმა კი დააბეს და სახლში დატოვეს. ბოროტმოქმედებმა გამოსასყიდი მოითხოვეს გატაცებულის მამისგან.
ქრისტიანი მისიონერი ფილიპე უოლტონი ერთი წელი ცხოვრობდა საკუთარ ფერმაში მასალატას ახლოს, ნიგერიაში.
„31 ოქტომბერს ამერიკის სამხედრო ძალებმა, ჩრდილოეთ ნიგერიაში ჩაატარეს მძევლის გადარჩენის ოპერაცია შეიარაღებული პირების მიერ მძევლად აყვანილი ამერიკის მოქალაქის გასათავისუფლებლად. ახლა ის უსაფრთხოდაა. სპეცოპერაციისას სამხედრო ძალების წარმომადგენლებიდან არავინ დაშავებულა.“ – განაცხადა აშშ-ის თავდაცვის მინისტრის თანაშემწემ.
თავისი წინაასარჩევნო კამპანიის დროს წარმოთქმულ ერთ-ერთ სიტყვაში დონალდ ტრამპმა მადლობა გადაუხადა აშშ-ის სპეციალური დანიშნულების ძალებს და განაცხადა: „ჩვენი ერი მიესალმება გაბედულ ჯარისკაცებს, რომლებმაც განახორციელეს მძევლის გათავისუფლების ოპერაცია და ზეიმობს ამერიკის კიდევ ერთი მოქალაქის მშვიდობიანად დაბრუნებას.“
ნიგერიის რესპუბლიკა დასავლეთ აფრიკაში მდებარე ქვეყანაა. მოსახლეობის 80% მუსლიმანია, დანარჩენი 20% კი ქრისტიანი. ინტერნეტგამოცემა Military Times-ის ინფორმაციით, რეგიონში გახშირებულია იმ ისლამისტი სამხედროების თავდასხმები, რომლებიც ისლამურ სახელმწიფოსა და „ალ-ქაიდასთან“ არიან დაკავშირებულები.
უოლტონი გაიტაცეს ორი თვის გასვლიდან მას შემდეგ, რაც ისლამურ სახელმწიფოსთან დაკავშირებულმა სამხედროებმა მოკლეს ჰუმანიტარული დახმარების ექვსი ფრანგი მუშაკი და მათი ადგილობრივი გიდი, როცა ისინი დედაქალაქში არსებული ველური ბუნების პარკში იმყოფებოდნენ.
ორგანიზაცია Open Doors-ის 2020 წლის ანგარიშში ნათქვამია, რომ აფრიკის აღნიშნული რეგიონი ისლამისტური ექსტრემისტული დაჯგუფებების მხრიდან მზარდი საფრთხის ქვეშაა.