შეერთებული შტატების სახელმწიფო დეპარტამენტმა განაახლა იმ სახელმწიფოების ყოველწლიური სია, რომლებიც იწვევენ „განსაკუთრებულ შეშფოთებას“ რელიგიური თავისუფლების საკითხებთან მიმართებით. აშშ-ის სახელმწიფო მდივნის, მაიკ პომპეოს, ოფიციალურ განცხადებაში წარმოდგენილი სია სახელმწიფო დეპარტამენტის საიტზე 7 დეკემბერს გამოქვეყნდა.
ბირმა, ჩინეთი, ერიტრეა, ირანი, ნიგერია, ჩრდილოეთ კორეა, პაკისტანი, საუდის არაბეთი, ტაჯიკეთი და თურქმენეთი – ასე გამოიყურება განახლებული სია.
აშშ მიიჩნევს, რომ ყველაზე მეტად სწორედ ეს სახელმწიფოები არიან „რელიგიური თავისუფლების სისტემატური, მუდმივი და სასტიკი დარღვევების“ მიმართ შემწყნარებლურნი ან მათი თანამონაწილენი, 1998 წლის რელიგიური თავისუფლების საერთაშორისო აქტის მიხედვით.
როგორც Christian Post იუწყება, ასეთ ქვეყნებს ნიგერია ოფიციალურად წელს დაემატა, რითაც გახდა პირველი დემოკრატიულ-სეკულარული სახელმწიფო, რომელიც ამ სიაში მოხვდა.
აღსანიშნავია ისიც, რომ რუსეთი ნიკარაგუასთან, კუბასთან და კომორის კუნძულებთან ერთად მიიჩნიეს ისეთ ქვეყნად, სადაც „აღმსარებლობის თავისუფლების მხრივ სერიოზული დარღვევები“ ფიქსირდება და იგი მეთვალყურეობის ქვეშ მყოფი ქვეყნების სპეციალურ სიაში შეიყვანეს.
მეთვალყურეობის ქვეშ მყოფი ქვეყნების სპეციალური სიიდან ამოღებულ იქნა უზბეკეთი და სუდანი იმ კონკრეტული პროგრესისთვის, რასაც, მაიკ პომპეოს განცხადებით, ბოლო წლის განმავლობაში მიაღწიეს ამ ქვეყნის მთავრობებმა. სახელმწიფო დეპარტამენტი ამ სახელმწიფოების მიერ გატარებულ საკანონმდებლო რეფორმებსა და პრაქტიკას მისაბაძ ნიმუშად ასახელებს.
სახელმწიფო მდივანი აცხადებს, რომ აშშ გააგრძელებს დაუღალავად მუშაობას, რათა ბოლო მოეღოს ადამიანთა დევნას და შევიწროებას რელიგიური ნიშნით მთელ მსოფლიოში და „თითოეულ ადამიანს ყველგან და ყოველთვის ჰქონდეს უფლება, იცხოვროს ისე, როგორც თავისი სინდისი უკარნახებს.“