შეიარაღებულმა ისლამისტმა სამხედროებმა 58 ადამიანი მოკლეს ბურკინა-ფასოს ჩრდილოეთ ნაწილში განხორციელებული თავდასხმისას 29 და 30 მაისს. ერთ-ერთი გადარჩენილის მოწმობით, თავდასხმა მიმართული იყო ქრისტიანებისა და რეგიონში არსებულ იძულებით გადაადგილებულ პირთა ბანაკებში მომუშავე ჰუმანიტარული დახმარების მუშაკების წინააღმდეგ. ამ ბანაკებში კი ძირითადად ჯიჰადისტთა ძალადობას გამოქცეული ქრისტიანები არიან შეფარებულნი.
სამ პროვინციაში განხორციელებულ თავდასხმათა შედეგად დაიღუპა, სულ მცირე, 58 ადამიანი, მათ შორის ბავშვებიც. ერთ-ერთმა გადარჩენილმა ქრისტიანულ ორგანიზაციას „ბარნაბას ფონდი“ უთხრა, რომ თავდასხმამ სანმატენგას პროვინციაში 6 მშვიდობიანი მოქალაქისა და 7 ჯარისკაცის სიცოცხლე შეიწირა.
კომპიენგას პროვინციაში ისლამისტებმა სროლა დაიწყეს საქონლის ბაზრობაზე, რის შედეგადაც, სულ მცირე, 30 ადამიანი დაიღუპა. ერთი დღით ადრე კი თავდასხმა მოხდა ვაჭრებზე, რომელთა შორისაც ბავშვებიც იყვნენ.
ისლამისტი ექსტრემისტების ძალადობამ უფრო და უფრო იმატა ბოლო წლის განმავლობაში, რის შედეგადაც ათასობით ადამიანი გახდა იძულებული, დაეტოვებინა საკუთარი სახლი. ქრისტიანებზე თავდასხმები კი 2019 წლის აპრილიდან გახშირდა, როცა ქვეყნის ჩრდილოეთით მდებარე ერთ-ერთ ქალაქში მცხოვრები ხუცესი, მისი ვაჟი და ეკლესიის ოთხი წევრი მოკლეს ისლამის მიღებაზე უარის თქმის გამო.