გაერთიანებული ერების გენერალურმა ასამბლეამ 28 ოქტომბერს მიიღო რეზოლუცია, სადაც იერუსალიმში მდებარე ტაძრის მთა მუსლიმანური სახელით – ალ-ჰარამ ალ-შარიფით – არის მოხსენიებული.
რეზოლუციაში ნათქვამია, რომ 193 წევრისგან შემდგარი საბჭო „დიდად შეშფოთებულია ბოლოდროინდელი დაძაბულობითა და ძალადობით ოკუპირებული პალესტინის ტერიტორიაზე, რაც გულისხმობს ასევე აღმოსავლეთ იერუსალიმს და იერუსალიმში არსებულ წმინდა ადგილებს, მათ შორის, ჰარამ ალ -შარიფს.“
რეზოლუციაში წერია, რომ სავალდებულოა პატივისცემა ისტორიული სტატუს-კვოს, წმინდა ადგილების განსაკუთრებული ღირსშესანიშნაობისა და იერუსალიმის მიმართ, რომელიც ძალზე მნიშვნელოვანია სამი მონოთეისტური რელიგიისთვის.
ისრაელის ელჩმა გაერთიანებული ერების ორგანიზაციაში, გილად ერდანმა, გენერალურ ასამბლეას განუცხადა, რომ რეზოლუცია სრულად უგულებელყოფს რაიმე კავშირის არსებობას ებრაელ ხალხსა და ტაძრის მთას შორის, რომელიც მათთვის ყველაზე წმინდა ადგილია.
„ეს სამარცხვინოა. ისტორიის გადაწერის ეს უპატივცემულო მცდელობა ვერ შეცვლის იმ უცილობელ ფაქტს, რომ ებრაელთა კავშირი ქალაქ იერუსალიმთან ათასობით წლის წინ იწყება. ისინი ვერც იმ ფაქტის შეცვლას ვერ შეძლებენ, რომ ახლა ჩვენი კავშირი იერუსალიმთან უფრო მტკიცეა, ვიდრე ოდესმე. უფრო და უფრო მეტ ქვეყანას გადმოაქვს თავისი საელჩო იერუსალიმში, ჩვენს გაერთიანებულ და განუყოფელ დედაქალაქში.“ – თქვა ერდანმა.
ტაძრის მთა წმინდა ადგილია როგორც ებრაელებისთვის, ასევე ქრისტიანებისა და მუსლიმანთათვის. ეს არის ადგილი, სადაც ერთ დროს იდგა პირველი და მეორე ებრაული ტაძარი, სანამ მათ დაანგრევდნენ. დღეს ტაძრის მთაზე ორი მუსლიმანური მეჩეთია აღმართული: კლდის გუმბათი და ალ-აქსა.
რვა ქვეყანა (აშშ, ავსტრალია, კანადა, გვატემალა, უნგრეთი, მარშალის კუნძულები, მიკრონეზია და ნაურუ) უერთდება ისრაელს რეზოლუციის წინააღმდეგ ხმის მიცემაში. 16-მა ქვეყანამ თავი შეიკავა ხმის მიცემაში მონაწილეობისგან.
„გაერთიანებული ერების შეტევა ისრაელზე ცალმხრივი რეზოლუციის მეშვეობით, სიურეალისტურია.“ – განაცხადა ჰილელ ნოიერმა, ჟენევაში არსებული არასამთავრობო ორგანიზაცია UN Watch-ის აღმასრულებელმა დირექტორმა. ორგანიზაციის მიზანია გაერთიანებული ერების საქმიანობის ეფექტურობაზე დაკვირვება.