გაყალბებული ბიბლიური ისტორია გამოქვეყნდა კომუნისტურ სასკოლო სახელმძღვანელოში, ჩინეთში. ისტორია იოანეს სახარებაში, მე-8 თავში აღწერილ, მრუშ დედაკაცს ეხება. სახელმძღვანელოში წერია, რომ იესომ მრუშობაზე წასწრებული ქალი ჩაქოლა და თავად იესოც ცოდვილი იყო.
სახელმძღვანელოში, ვკითხულობთ: „ბრბოს უნდოდა ქალის ჩაქოლვა, კანონის თანახმად, მაგრამ იესომ თქვა: ‘დაე, მან ესროლოს პირველი ქვა, ვინც უცოდველია’. ამის გაგონებისას, ხალხი სათითაოდ გაიკრიფა და როცა ყველა წავიდა, იესომ ჩაქოლა ქალი და თან ამბობდა: ‘მეც ცოდვილი ვარ, მაგრამ თუ კანონი მხოლოდ უცოდველი ადამიანების აღსასრულებელი იქნებოდა, მაშინ კანონი აღარც იარსებებდა.’“
ჩინეთში რელიგიური თავისუფლებისა და ადამიანთა უფლებების დამცველი ჟურნალი „Bitter Winter“-ი წერს, რომ სახელმძღვანელოში მოცემული დამახინჯებული ბიბლიური ისტორია მიზნად ისახავს ჩინეთის კომუნისტური პარტიის კანონის უზენაესობის წარმოჩენას.
„აზიის კათოლიკეთა ახალი ამბების გაერთიანება“ იუწყება, რომ ჩინელი კათოლიკეები აღშფოთებას გამოთქვამენ ბიბლიის დამახინჯების გამო. ისინი მოითხოვენ, რომ სახელმძღვანელოს ავტორებმა და გამომცემლებმა ტექსტი შეცვალონ და საჯაროდ მოიხადონ ბოდიში.
გაყალბებული ბიბლიური ისტორია ჩინურ სასკოლო სახელმძღვანელოში
