დევიდ იონგი ჩო, მსოფლიოში უდიდესი ეკლესიის დამაარსებელი, გარდაიცვალა

დევიდ იონგი ჩო, სამხრეთ კორეის ყველაზე დიდი და ყველაზე ცნობილი ეკლესიის დამაარსებელი, დღეს დილით გარდაიცვალა 85 წლის ასაკში, ტვინში სისხლის ჩაქცევით.  

იონგი ჩომ იოიდოს სრული სახარების ეკლესია დააარსა 1958 წელს, რომელიც მსოფლიოში უდიდეს ეკლესიად იქცა. ეკლესიის ლიდერთა საერთაშოსირო ორგანიზაციის, Leadership Network-ის ინფორმაციით, ღვთისმსახურებებს ყოველკვირეულად 480 ათასზე მეტი ადამიანი ესწრება, ხოლო ეკლესიის წევრთა რიცხვი მილიონ წევრს აჭარბებს.

დაარსების დროიდან იოიდოს ეკლესიამ ხუთასზე მეტი ეკლესია დააფუძნა მთელ სამხრეთ კორეაში და ათასობით მისიონერი გაგზავნა მსოფლიოს სხვადასხვა ქვეყანაში. თავად იონგი ჩოს, მსოფლიოს 71 ქვეყანაში გამართულ ქრისტიანულ ღონისძიებაში აქვს მონაწილეობა მიღებული.

დევიდი 1936 წელს დაიბადა ბუდისტების ოჯახში. 17 წლის ასაკში მას ფილტვების ტუბერკულოზის დიაგნოზი დაუსვეს და უთხრეს, რომ დიდხანს ვერ იცოცხლებდა. დევიდი ავადმყოფობისას მოექცა ქრისტიანულ რწმენაზე და მოგვიანებით ამბობდა, რომ სწორედ ამის გამო განიკურნა ის სასწაულებრივად. 1956 წელს იონგი ჩომ თეოლოგიის სწავლა დაიწყო სეულის სრული სახარების კოლეჯში, რომლის დამთავრების შემდეგაც დააარსა ეკლესია სეულის ჩრდილო-დასავლეთ ნაწილში. ეკლესია მოგვიანებით გადავიდა იოიდოში.

დევიდ იონგი ჩო არა მხოლოდ რელიგიურ საქმიანობაში იყო ჩართული, არამედ სოციალურ აქტივობებშიც იღებდა მონაწილეობას. 1988 წელს მან დააარსა გაზეთი „Kookmin Daily“ და ასევე ჩამოაყალიბა ადამიანთა უფლებების, ბავშვთა კეთილდღეობისა და გარემოს დაცვის საერთაშორისო არასამათავრობო ორგანიზაცია.

იონგი ჩო უფროსი ხუცესის თანამდებობიდან 2008 წელს გადადგა.