აშშ-ის სენატის არჩევნების მეორე ტურში დემოკრატიული პარტიის წარმომადგენელმა, რაფაელ ვორნოკმა გაიმარჯვა. ვორნოკმა რესპუბლიკელი კელი ლოფლერი დაამარცხა და ჯორჯიის შტატის ისტორიაში პირველი შავკანიანი სენატორი გახდა. რაფაელ ვორნოკი ბოლო 15 წლის განმავლობაში ატლანტის ეკლესიის უფროსი ხუცესი გახლდათ.
მაიკლ ბრიუერი, რომელიც საარჩევნო კამპანიის სპიკერი გახლავთ, მედიასთან აცხადებს, რომ ვორნოკი უფროსი ხუცესის სტატუსს კვლავ შეინარჩუნებს.
ვორნოკმა, რომელიც 2005 წლიდან უძღვება ევენეზერის ბაპტისტურ ეკლესიას ატლანტაში, მსგავსი რამ განაცხადა RNS-თან ნოემბერში, არჩევნებისას:
„მიჩნეულია, რომ ხუცესისთვის უჩვეულოა, ჩართული იყოს ისეთ ‘ბინძურ საქმეში’, როგორიც პოლიტიკაა, მაგრამ მე ვხედავ ჩემი მსახურების გაგრძელებას ამ სფეროში: უპირველესად, როგორც ქრისტიანი მქადაგებლის, შემდეგ დამცველის და იმედი მაქვს, შემდეგში – კანონმდებლის. ვაცხადებ, რომ ახალ ნაბიჯს ვდგამ ჩემს შემდეგ მოწოდებაში, რათა ვემსახურო ღმერთს და ადამიანებს და არ ჩამოვდივარ კათედრიდან.“
მარლა ფრედერიკი, რელიგიის და კულტურის, ემორის უნივერსიტეტის კანდლერის თეოლოგიის სკოლის პროფესორი, აცხადებს, რომ აქტიური ხუცესი უჩვეულო არ უნდა იყოს პოლიტიკური ცხოვრებისთვის აშშ-ში.
„არსებობს მსგავსი მაგალითები. ხუცესობა არის ერთ-ერთი იმ პოზიციათაგანი, სადაც თქვენ გიწევთ ძალიან ახლოს ყოფნა ხალხთან ყოველდღიურად და მათ საჭიროებებთან. რამდენადაც სენატი ვალდებულია, რომ წარმოადგენდეს ადამიანთა საჭიროებებს, ჩემი აზრით, ხუცესი სწორედ ის ადამიანია, რომელიც უკეთ იცნობს ხალხის იმ სირთულეებს, რომლებთანაც მათ ყოველდღიურ ცხოვრებაში უწევთ გამკლავება.“ – განაცხადა მან.
მართლაც, ჩვენ შეგვიძლია ვორნოკის პარალელურად გავიხსენოთ აფროამერიკელი მსახურები, რომლებიც აგრძელებდნენ ეკლესიაში მსახურებას, სენატში მოღვაწეობის პარალელურად: რიჩარდ ჰარვი ჯეინი (1873-75, 1877-79); ადამ კლეიტონ პირველი უმცროსი (1945-1971); ფლოიდ ფლეიკი (1987-1997); ჯონ ლუისი (1987-2020); ემანუელ კლივერი 2005 წლიდან დღემდე.
შეგახსენებთ, რომ დემოკრატთა პარტიას ვორნოკის გარდა კიდევ ერთი ხმა სჭირდებოდა, რათა მიეღო უმრავლესობა სენატში და ეს ერთი ადგილიც მიიღო, როცა ჯონ ოსოფმა მოქმედი რესპუბლიკელი სენატორი დევიდ პერდუ დაამარცხა. ახლა ძალთა თანაფარდობა სენატში 50/50-ზე იქნება, რაც იმას ნიშნავს, რომ აშშ-ის ვიცე-პრეზიდენტი მიიღებს გადამწყვეტ ხმას მას შემდეგ, რაც 20 იანვრიდან, კამალა ჰარისი და ჯო ბაიდენი დაიკავებენ თანამდებობებს.