პრეზიდენტმა დონალდ ტრამპმა ხუთშაბათს გამოაქვეყნა ვიდეომიმართვა, რომელშიც დაგმო ოთხშაბათს მომხდარი ძალადობა კაპიტოლიუმში და განაცხადა, რომ არსებული სიტუაცია მოითხოვს განკურნებას და შერიგებას. თეთრი სახლის მიერ გამოქვეყნებულ ამ მოკლე ვიდეოში პრეზიდენტმა თქვა:
„მინდა დავიწყო ამერიკის შეერთებული შტატების კაპიტოლიუმზე საზიზღარ თავდასხმაზე საუბრით. როგორც ყველა ამერიკელი, მეც აღშფოთებული ვარ ძალადობით, უკანონობითა და ქაოსით. დაუყოვნებლივ ავამოქმედე ეროვნული გვარდია და ფედერალური სამართალდამცავი ორგანოები, შენობის დაცვისა და შემოჭრილთა განდევნის მიზნით. ამერიკა არის და ყოველთვის უნდა იყოს კანონისა და წესრიგის ერი. კაპიტოლიუმში შეჭრილმა დემონსტრანტებმა შებღალეს ამერიკული დემოკრატიის ადგილსამყოფელი.“
ტრამპმა თავის გამოსვლაში მეამბოხეებსაც მიმართა:
„თქვენ, ვინც მონაწილეობას იღებდით ნგრევასა და აოხრებაში და ძალადობის აქტების ჩადენაში, არ წარმოადგენთ ჩვენს ქვეყანას. თქვენ, ვინც კანონი დაარღვიეთ, პასუხს აგებთ.“
პრეზიდენტი არჩევნებსაც შეეხო და თქვა, რომ ამერიკელმა ერმა წინსვლა უნდა განაგრძოს.
„ჩვენ დაძაბული არჩევნები გვქონდა ახლახან და ემოციები ჯერ კიდევ ძლიერია, მაგრამ ახლა უნდა დავცხრეთ და აღვიდგინოთ სიმშვიდე. უნდა გავაგრძელოთ ამერიკის საქმეები. ჩემმა კამპანიამ მტკიცედ გამოიყენა არჩევნების შედეგების გასაჩივრების ყველა იურიდიული შესაძლებლობა. ჩემი ერთადერთი მიზანი იყო ხმის მიცემის სამართლიანობის უზრუნველყოფა. ასე მოქცევით მე ვიბრძოდი ამერიკული დემოკრატიის დასაცავად.
ძველებურად მტკიცედ მწამს, რომ ჩვენ გვმართებს არჩევნების შესახებ ჩვენი კანონების რეფორმა, რათა მოხდეს ყველა ხმის მიმცემის იდენტურობისა და საარჩევნო უფლების შემოწმება, და რათა უზრუნველვყოთ ყველა მომავალი არჩევნებისადმი ნდობა. ახლა კი კონგრესმა დაამტკიცა შედეგები. 20 იანვარს უკვე ახალი ადმინისტრაცია დაიკავებს თანამდებობას ოფიციალურად. ახლა ჩემს კონცენტრაციასა და ძალისხმევას მივმართავ იმისკენ, რომ უზრუნველვყო ძალაუფლების რბილი, უწყვეტი, თანმიმდევრული და ორგანიზებული გადაცემა.“ – განაცხადა ტრამპმა.
დონალდ ტრამპმა ასევე თქვა, რომ 2020 წელი გამოწვევებით სავსე იყო და პანდემიამ მოქალაქეების ცხოვრება სრულად გადაატრიალა. პრეზიდენტმა დაამატა, რომ პანდემიის შემდეგ მსოფლიოს უძლიერესი ეკონომიკის აღშენება ყველას ერთად, შეთანხმებულ მუშაობას მოითხოვს.
„ჩვენი ქვეყნის მოქალაქეებო, ჩემი ცხოვრების მთავარი პატივი იყო, მემსახურა თქვენთვის პრეზიდენტად. და ყველა ჩემო მხარდამჭერებო, ვიცი, რომ იმედგაცრუებულები ხართ, მაგრამ მინდა იცოდეთ, რომ ჩვენი გასაოცარი თავგადასავალი მხოლოდ იწყება. გმადლობთ. ღმერთმა გაკურთხოთ და ღმერთმა აკურთხოს ამერიკა.“ – თქვა ტრამპმა მიმართვის ბოლოს.