ისრაელსა და ტერორისტულ დაჯგუფება „ჰამასს“ შორის ცეცხლის შეწყვეტის შესახებ შეთანხმება ძალაში შევიდა ადგილობრივი დროით 02:00 საათზე და 11-დღიანი სარაკეტო თავდასხმების სერია ორმხრივად შეწყდა.
ისრაელის პრემიერ-მინისტრის, ბენიამინ ნეთანიაჰუს ოფისის მიერ გავრცელებულ განცხადებაში ნათქვამია:
„მინისტრები ყოველგვარი წინაპირობის გარეშე დაეთანხმნენ ეგვიპტის ინიციატივას ცეცხლის ორმხრივი შეწყვეტის შესახებ.“
კონფლიქტის დასრულებას ორივე მხარე ზეიმობს.
„მჯერა, რომ პალესტინელები და ებრაელები თანაბრად იმსახურებენ უსაფრთხოდ ცხოვრებას და თავისუფლებით, კეთილდღეობით და დემოკრატიით სარგებლობას. ჩემი ადმინისტრაცია ამ მიზნის მისაღწევად გააგრძელებს მშვიდი დიპლომატიის გატარებას. მჯერა, რომ ჩვენ გვაქვს რეალური შესაძლებლობა პროგრესის მიღწევისთვის და მზად ვარ, ვიმუშაო ამისთვის.“ – განაცხადა აშშ-ის პრეზიდენტმა ჯო ბაიდენმა.
„ღაზის სექტორში სიტუაცია დიდი ხანია არამდგრადია. მხოლოდ პოლიტიკური გადაწყვეტა მოიტანს მდგრად მშვიდობას და სამუდამოდ დაასრულებს პალესტინა-ისრაელის კონფლიქტს. ევროკავშირი მზად არის, სრულად დაუჭიროს მხარი ისრაელისა და პალესტინის ხელისუფლებას ამ ძალისხმევაში.“ – ნათქვამია ევროკავშირის მიერ გავრცელებულ განცხადებაში.
ბოლო მონაცემებით, ღაზის სექტორში 232 ადამიანი დაიღუპა, მათ შორის 65 ბავშვი, ხოლო ისრაელში – მინიმუმ 12 ადამიანი, მათ შორის 2 ბავშვი.
შეგახსენებთ, რომ სარაკეტო თავდასხმა მას შემდეგ დაიწყო, რაც ისრაელმა „ჰამასის“ ულტიმატუმი, დაეტოვებინათ ალ-აქსას ტერიტორია სამართალდამცველებს, არ შეასრულა. ტერორისტულმა დაჯგუფებამ თავდაპირველად იერუსალიმის მიმართულებით 7 რაკეტა ისროლა, შემდეგ კი ცეცხლი გახსნა სხვა ქალაქების მიმართულებითაც. ისრაელზე სარაკეტო თავდასხმის გამო, ქვეყანაში საგანგებო მდგომარეობა გამოცხადდა. ღაზის სექტორიდან ისრაელის მიმართულებით 1000-ზე მეტი რაკეტა და საარტილერიო ჭურვი ისროლეს რამდენიმე დღის განმავლობაში.
დაპირისპირება ებრაელებსა და პალესტინელებს შორის კვირაზე მეტია გრძელდება. დაპირისპირების მიზეზი ისრაელის ხელისუფლების მიერ პალესტინელი ოჯახების გასახლების შესახებ მიღებული გადაწყვეტილებაა. არეულობა იერუსალიმში ისრაელის უზენაესი სასამართლოს მიერ დაგეგმილი სხდომის წინ დაიწყო, რომელზეც შეიხ ჯარას რაიონიდან 70 პალესტინელი ოჯახის გასახლების საკითხი უნდა განხილულიყო, თუმცა ისრაელის გენერალური პროკურორის მოთხოვნით, სხდომა 30 დღით გადაიდო.
ალ-აქსას მეჩეთში, სადაც ათასობით პალესტინელი შეიკრიბა, მათ ისრაელის საწინააღმდეგო ფრაზების სკანდირება დაიწყეს, რასაც ადგილზე მობილიზებულ პოლიციასთან მწვავე დაპირისპირება მოჰყვა.