„ქრისტიანული ერთიანობის ხელშემწყობი პაპის საბჭო და ლუთერანული მსოფლიო ფედერაცია ხაზს უსვამენ მათ ვალდებულებას, ერთად იარონ საერთო გზაზე კონფლიქტიდან მოზიარეობამდე.“ – ნათქვამია Vatican News-ის ოფიციალურ ვებგვერდზე.
2021 წლის 3 იანვარს გამოქვეყნდა ქრისტიანული ერთიანობის ხელშემწყობი პაპის საბჭოსა და ლუთერანული მსოფლიო ფედერაციის ერთობლივი დეკლარაცია გამართლების მოძღვრების შესახებ. ეს იტალიურ ენაზე შესრულებული ახალი თარგმანი გახლავთ.
პირველი დოკუმენტი, რომელსაც ხელი 1999 წელს მოეწერა, კათოლიკეებსა და ლუთერანებს შორის დიალოგის პირველი მცდელობის ნაყოფი გახლდათ. საბოლოოდ, მან მეთოდური ეკლესიებისგან, ანგლიკანებისა და რეფორმატორული ეკლესიების საერთაშორისო საზოგადოებისგან აღიარება მოიპოვა. კათოლიკე ეპისკოპოს ფარელის თქმით, ძველ დოკუმენტში გარკვეული უზუსტობები არსებობდა, რის გამოც ახალი თარგმანის შედგენა გახდა საჭირო. შეიძლება ითქვას, რომ ახალი დეკლარაცია სინამდვილეში ახალი სულაც არ გახლავთ, ის 1999 წლის დაზუსტებული ვერსიაა.
„ჩვენც იგივე დოქტრინა გვაქვს გადარჩენის თაობაზე, ასე რომ, ჩვენ მივაღწიეთ შეთანხმებას ისეთ საკითხზე, რაც ფუნდამენტური იყო, რასაც საუკუნეების განმავლობაში განხეთქილება, დაშორება და ამდენი კონფლიქტი მოჰყვა.“ – განაცხადა ეპისკოპოსმა ფარელმა.
„ჩვენთვის, ქრისტიანებისთვის გადამწყვეტი მნიშვნელობა აქვს ცხონების საკითხს. ამ საკითხმა XVI საუკუნეში მიგვიყვანა მწვავე პოლემიკამდე, რაც ეკლესიის განხეთქილებით დასრულდა. კამათიდან ასწლეულების შემდეგ, 1999 წელს კათოლიკეებმა და ლუთერანებმა შეძლეს ეღიარებინათ, რომ გადარჩენა არა ჩვენი დამსახურებით მოგვეცა, არამედ უფლის მადლით და ქრისტეს რწმენით. აღსანიშნავია, რომ მარტინ ლუთერის მიერ პაპის ანტიქრისტედ მოხსენიებამ დიდი როლი შეასრულა განხეთქილებაში. ლუთერანთა მსოფლიო ფედერაციასა და ქრისტიანთა ერთობის საკითხებში პაპის საბჭოს შორის დიდი გამოწვევა დგას – ეკუმენური გადასახედიდან განხილულ იქნეს ისტორიული, კანონიკური და საღვთისმეტყველო საკითხები. ამ საკითხების განხილვა გარკვეული ხნის წინ დაევალა ეკუმენური ექსპერტების ჯგუფს, ჩვენ იმედს გამოვთქვამთ, რომ უახლოეს პერიოდში გამოქვეყნდება კიდევ ერთი საერთო გზავნილი.“ – განუცხადა კარდინალმა კოხმა Vatican News-ს.
კარდინალ კოხის თქმით, 2030 წელს აღნიშნული იქნება აუგსბურგის რწმენის აღიარების ხუთასი წლის იუბილე, რომელიც პროტესტანტთა რწმენის აღიარება გახლავთ. კოხის აზრით, აუგსბურგის რწმენის აღიარება თავისი ღრმა შინაარსით ეკუმენურია, რასაც შეუძლია კათოლიკეებსა და ლუთერანებს შორის ურთიერთობების აღდგენა.
