3 ნოემბერს, ქალაქ სანტიაგო-დე-კუბის ხელისუფლებმა დაანგრიეს ეკლესია და დააპატიმრეს ხუცესი, რომელმაც სოციალური მედიის საშუალებით პირდაპირ ეთერში გაუშვა ეკლესიის ნგრევის პროცესი.
ადამიანის უფლებადამცველი ორგანიზაციის, Christian Solidarity Worldwide-ის ინფორმაციით, ეკლესიას 2015 წლიდან ემუქრებოდნენ. ორგანიზაციის განცხადებით, კუბის ხელისუფლების წარმომადგენლები ამტკიცებენ, რომ ეკლესიის დანგრევა ახალი სარკინიგზო ხაზის გასაყვანად გახდა საჭირო. სხვადასხვა წყაროს ცნობით კი, იმ ტერიტორიაზე ეკლესიის გარდა სხვა არცერთი შენობა არ დაუნგრევიათ.
ხუცესმა ალაინ ტოლედანომ და სხვა ეკლესიების ხუცესებმა მომხდარი „ფეისბუკზე“ პირდაპირ ეთერში გაუშვეს.
ვიდეოში ასახულია, როგორ ანგრევენ ეკლესიის შენობას ბულდოზერების და ტრაქტორების მეშვეობით. ხუცესი ტოლედანო მოუწოდებდა „ფეისბუკზე“ ვიდეოს მაყურებლებს, რომ გაეზიარებინათ ვიდეო: „მათ იარაღზე მეტად ინფორმაციის ეშინიათ. გააზიარეთ ეს ვიდეო, სადაც ჩანს, როგორ ესხმის თავს ეკლესიას კუბის მთავრობა. ეს არის სახელმწიფო უსაფრთხოების თავდასხმა ღვთის ხალხზე. დაე, გაიგოს მსოფლიომ, რა ხდება აქ. გაიგოს ამ პოლიტიკური სისტემის – კომუნისტური სისტემის ნამდვილი სახის შესახებ.“ – თქვა მან.
ორგანიზაცია Christian Solidarity Worldwide-ის ცნობით, ხუცესი ტოლედანო კუბის პოლიციამ დააკავა და მასთან კომუნიკაციის უფლებას არავის აძლევენ.
ორგანიზაციის აღმასრულებელი დირექტორი სკოტ ბაუერი აცხადებს: „ჩვენ ვგმობთ ‘ღმერთის ასამბლეის’ ეკლესიის დანგრევას. ამ ეკლესიას 2015 წლიდან ემუქრებოდა მთავრობა. ეს რელიგიური თავისუფლების უხეში ხელყოფაა. მოვუწოდებთ კუბის ხელისუფლებას, დაუყოვნებლივ გაათავისუფლოს ხუცესი ალაინ ტოლედანო და შეწყვიტოს მისი და მისი ოჯახის დევნა.“
შეგახსენებთ, რომ კუბა ათეისტური ქვეყანაა და ათწლეულების განმავლობაში იგი დახურულ ქვეყნად ითვლებოდა დიქტატორული რეჟიმის გამო. კუბა ფიდელ კასტროს მმართველობის პერიოდში გახდა ერთპარტიული სოციალისტური ქვეყანა. კასტრო კუბელ ხალხს თითქმის ნახევარი საუკუნის განმავლობაში რეპრესიების მეშვეობით მართავდა 2008 წლამდე, შემდეგ კი მმართველობა თავის ძმას გადაულოცა, რომელიც 2018 წელს მიგელ მარიო დიას-კანელ ბერმუდესმა შეცვალა. კუბის მთავრობის დემოკრატიის ინდექსი 2016 წლის მონაცემებით ფასდება, როგორც „ავტორიტარული“. კუბის მთავრობას ხშირად ადანაშაულებენ ადამიანის უფლებების დარღვევის ისეთ ფაქტებზე, როგორებიცაა: წამება, უკანონო პატიმრობა, უსამართლო სასამართლო.