ადამიანის უფლებებისა და რელიგიის თავისუფლების დამცველი ორგანიზაცია Christian Solidarity Worldwide ჩინეთის ხელისუფლებას მოუწოდებს, გააუქმოს უკვე დაგეგმილი შეზღუდვები ინტერნეტში განთავსებულ რელიგიურ ინფორმაციაზე. ორგანიზაციის აზრით, ეს დამანგრეველ გავლენას მოახდენს ჩინეთში არსებულ რელიგიურ თემებსა და საზოგადოებებზე.
რელიგიური შინაარსის ინფორმაციის ინტერნეტში განთავსებასთან დაკავშირებული მკაცრი შეზღუდვების შესახებ ინფორმაცია ჩინეთის მთავრობამ უკვე გამოაქვეყნა. შეზღუდვები 1-ლი მარტიდან ამოქმედდება.
ამ ახალი რეგულაციების მიხედვით: „უცხოურ ორგანიზაციებსა და ცალკეულ პირებს არ აქვთ უფლება იმისა, რომ ჩინეთის ტერიტორიაზე ონლაინ გაავრცელონ რელიგიური შინაარსის ინფორმაცია.“
ორგანიზაცია Christian Solidarity Worldwide-ის თანახმად, შეზღუდვები ვრცელდება ნებისმიერი აპლიკაციის ან ონლაინფორუმის მეშვეობით გაზიარებულ ტექსტურ შეტყობინებებზე, სურათებზე, აუდიო და ვიდეომასალაზე. ორგანიზაცია განსაკუთრებულად შეშფოთებულია იმით, რომ იკრძალება რელიგიური შინაარსის ონლაინღონისძიებები და ღვთისმსახურებანი.
ასევე იკრძალება ისეთი რელიგიური შინაარსის ინფორმაცია, რომელიც „არასრულწლოვნებს რელიგიაზე მოქცევისკენ უბიძგებს“. ამის გამო უკანონო იქნება ყველა სახის ქრისტიანული მსახურება, რომელიც ახალგაზრდებისათვის არის განკუთვნილი.
„მოვუწოდებთ ჩინეთის ხელისუფლებას, შეწყვიტოს ეკლესიების წევრთა შევიწროება, გაათავისუფლოს მშვიდობიანი რელიგიური საქმიანობის გამო დაკავებული ადამიანები და ასევე, სასწრაფოდ გააუქმოს დაგეგმილი შეზღუდვები რელიგიური ინფორმაციის გავრცელებასთან დაკავშირებით, რადგან შესაძლოა ამ შეზღუდვებმა დამანგრეველი შედეგები გამოიღოს ჩინეთის რელიგიური თემებისათვის.“ – აცხადებს ორგანიზაცია.