დღეს ებრაელი ხალხი შავუოთს აღნიშნავს. შავუოთი სინაის მთაზე თორის მიღებასთან დაკავშირებული ზეიმია. იგი ებრაელი ხალხის ეგვიპტის მონობიდან საბოლოო განთავისუფლების სიმბოლოა და წლიდან წლამდე ებრაელებს სინაის მთაზე მომხდარ სასწაულს შეახსენებს.
ამ დღესთან დაკავშირებით, ისრაელის პრემიერ-მინისტრმა, ბენიამინ ნეთანიაჰუმ საკუთარ ოფიციალურ „ფეისბუკგვერდზე“ დაწერა:
„აღვნიშნავთ შავუოთს – თორის მიცემას ისრაელისთვის. როცა ათი მცნება მივიღეთ, ისრაელი ერთად იდგა, როგორც ერთი კაცი, ერთ სულში. ასევე ვდგავართ დღეს – როგორც ერთი კაცი, ერთ სულში. ერთ სულში ჩვენი ქვეყნისთვის ბრძოლაში, ერთ სულში ჩვენი ჯარისკაცების უკან, ერთ სულში ჩვენი უსაფრთხოებისთვის და ჩვენი მომავლისთვის.“
შავუოთი ერთ-ერთი ყველაზე მთავარი და გამორჩეული ებრაული დღესასწაულია. იგი ასევე ცნობილია, როგორც ორმოცდამეათე დღის და პირველი ნაყოფების დღესასწაულად.
შავუოთი ასევე მჭიდროდ არის დაკავშირებული პასექთან. თვითონ ებრაული სახელწოდებაც – „შავუოთი“ ნიშნავს „კვირებს“ და აღინიშნება პასექის დღესასწაულის დასრულებიდან შვიდი კვირის შემდეგ. შავუოთი ემთხვეოდა პასექის შაბათის გასვლიდან ორმოცდამეათე დღეს.
თორაში შავუოთის დღესასწაული ხუთჯერ არის ნახსენები.