ნიგერიის სამოქალაქო საზოგადოების ორგანიზაციის შეფასებით, 2020 წლის დასაწყისიდან დღემდე ქვეყანაში, დაახლოებით, 620 ქრისტიანი მოკლეს და ასობით სახლი და ეკლესია დაანგრიეს ფულანის რადიკალური დაჯგუფების წევრებმა და ისლამისტმა ტერორისტებმა.
ანამბრაში არსებული არასამთავრობო ორგანიზაცია (International Society for Civil Liberties & Rule of Law), რომელსაც ხელმძღვანელობს ქრისტიანი ემეკა უმიგბალასი, ავრცელებს განცხადებას, სადაც გაშუქებულია 2020 წლის დასაწყისიდან დღემდე ნიგერიაში ტერორისტების მიერ ჩადენილ შემზარავ ქმედებათა შედეგები.
ანგარიშში ნათქვამია, რომ ფულანის მწყემსთა სამხედრო დაჯგუფებამ, ბოკო ჰარამთან დაკავშირებულმა ტერორისტებმა და ისლამურმა სახელმწიფომ გააძლიერეს ქრისტიანთა წინააღმდეგ მიმართული ძალადობა.
ანგარიშის მიხედვით, ტერორისტებმა დახოცეს, სულ მცირე, 620 დაუცველი ქრისტიანი და დაწვეს ან დაანგრიეს მათი შესაკრებელი ადგილები.
„ქრისტიანთა წინააღმდეგ მიმართულმა ძალადობამ ყოველგვარ ზღვარს გადააჭარბა და გამოიწვია ქვეყნის თავდაცვითი ძალებისა და პოლიტიკოსების შეშფოთება, რომელთაგან ზოგი გამოსავალს ეძებს, ზოგი კი ცდილობს, ჯიჰადისტებს შეეკრას.“ ‒ აცხადებს ორგანიზაცია.
ორგანიზაციის Open Doors USA’s 2020 წლის ანგარიშის მიხედვით, ნიგერია მე-12 ადგილზეა მსოფლიოში ქრისტიანთა დევნის მხრივ.