ინტერნეტგამოცემა Morning Star News-ის ინფორმაციით, ისლამისტმა ექსტრემისტებმა ნიგერიის შტატ ბორნოში, სოფელ ტაკულაშში, მოკლეს 12 ქრისტიანი, მათ შორის, ხუცესიც. ასევე, გაიტაცეს ქალები და ბავშვები. თავდასხმა მოხდა 2020 წლის 1 ნოემბერს. ადგილობრივთა ცნობით, თავდამსხმელები „ბოკო ჰარამთან“ დაკავშირებული ჯგუფის წარმომადგენლები არიან.
„მათ ასევე დაწვეს სახლები და წაიღეს საკვების მარაგი, რაც სახლებში გვქონდა. სროლა ორ საათს გაგრძელდა. მათ მოკლეს 12 ადამიანი, სამი ქალი და ოთხი ბავშვი კი გაიტაცეს“. – განუცხადა Morning Star News-ს ზაქარია მუსამ, რომელიც Brethren in Nigeria-ის ეკლესიის ხუცესია.
მუსას თქმით, თორმეტი მოკლული ადამიანიდან ცხრა ეკლესიის წევრი იყო. სროლას ასევე ემსხვერპლა ეკლესია Church of Christ in Nations-ის ხუცესი.
ნიგერია მდებარეობს დასავლეთ აფრიკაში. ქვეყანა, ძირითადად, ქრისტიანებითა და მუსლიმანებითაა დასახლებული. ქრისტიანი მოსახლეობა, უმეტესწილად, სამხრეთ ნაწილში ცხოვრობს, მუსლიმანი მოსახლეობა კი ჩრდილოეთ ნაწილში.
საერთაშორისო საქველმოქმედო ადამიანის უფლებადამცველი ქრისტიანული ორგანიზაცია Open Doors-ის 2020 წლის ჩამონათვალში ნიგერია მსოფლიოში მე-12 ადგილზეა ქრისტიანთა დევნის მხრივ, ხოლო პაკისტანის შემდეგ, მეორე ადგილზეა რწმენის გულისათვის დახოცილ ქრისტიანთა რაოდენობით.