ჰოლანდიის პარლამენტი აპირებს, ნიადაგი მოამზადოს კანონპროექტისთვის, რომელიც 1-დან 12 წლამდე ასაკის, სასიკვდილო სენით დაავადებული ბავშვებისათვის ევთანაზიის დაკანონებას ითვალისწინებს. ამის შესახებ ნიდერლანდების ჯანდაცვის მინისტრმა, ჰუგო დე იონგემ, სამშაბათს, ქვეყნის პარლამენტში გამოსვლისას განაცხადა.
ჰოლანდია მსოფლიოს სახელმწიფოთა შორის ცნობილია ევთანაზიის მიმართ ყველაზე ლიბერალური მიდგომით. ამ ეტაპზე ჰოლანდიაში ევთანაზია დაშვებულია 1 წლამდე ასაკისა და 12 წლის ზემოთ ბავშვებისათვის.
„არავითარი მიზეზი არ გვაქვს ვიფიქროთ, რომ ევთანაზიას მხოლოდ ‘სასიკვდილოდ დაავადებული’ ბავშვების შემთხვევაში მიმართავენ. ჰოლანდიაში ბავშვთა ევთანაზია ხომ გრონინგენის პროტოკოლის მიხედვით ხდება, რაც ითვალისწინებს, როგორც სასიკვდილოდ დაავადებული, ასევე სერიოზულ ნაკლოვანებათა მქონე ბავშვების ევთანაზიას.“ – წერს უესლი ჯ. სმიტი, Discovery Institute-ის უფროსი მეცნიერი, ავტორი და იურისტი.
გრონინგემის პროტოკოლი 2004 წელს შედგენილი სამედიცინო დოკუმენტია. პროტოკოლის მიხედვით ჰოლანდიელ ექიმებს, გარკვეული, დასაბუთებული მიზეზების (მათ შორის, აუტანელი ტანჯვის და ცხოვრების მოსალოდნელი ცუდი ხარისხის) არსებობის შემთხვევაში, მშობლებთან და სოციალურ მუშაკებთან შეთანხმებით, შეუძლიათ ახალშობილთა „სიცოცხლის დასრულება“ სისხლის სამართლებრივი დევნის შიშის გარეშე.
შეგახსენებთ, რომ ნიდერლანდები პირველი ევროპული ქვეყანაა, სადაც ევთანაზია დაკანონდა 2002 წელს. ევროპის ბიოეთიკის ასოციაცია AllianceVita-ს ცნობით, მისი დაკანონებიდან პირველ ათწლეულში ევთანაზიის შემთხვევათა რიცხვი გაორმაგდა; პირველი 15 წლის განმავლობაში კი გასამმაგდა. 2016 წლისათვის, საშუალოდ, 16 ადამიანის ევთანაზია ხდებოდა ყოველდღიურად, რამაც ჰოლანდიაში ყოველწლიურად გარდაცვლილ ადამიანთა საერთო რაოდენობის 4% შეადგინა.