როგორც Fox News-ი იუწყება, ეჭვმიტანილი, რომელიც პოლიციამ კვირას, ნიუ-იორკის საკათედრო ტაძართან სროლის შემდეგ მოკლა, მძევლების აყვანას და აშშ-ის მთავრობისადმი მოთხოვნის წაყენებას გეგმავდა.
წარმოშობით დომინიკელ 52 წლის ლუის ვასკესს ბრონქსიდან, ჯიბეში ფურცელი ედო, სადაც ეწერა, რომ ის მძევლების აყვანასა და დაკავებას გეგმავდა იქამდე, ვიდრე აშშ-ის მთავრობა, ბანკები და კორპორაციები არ დათანხმდებოდნენ მის მოთხოვნას – დახმარებოდნენ ღარიბ ადამიანებს ლათინოამერიკულ ქვეყნებში. ამის შესახებ ნიუ-იორკის ერთ-ერთი ტელევიზია, NBC New York-ი იუწყება. ტელევიზიამ ეჭვმიტანილის ჩანაწერის შესახებ ინფორმაცია სამართალდამცავი ორგანოების ერთ-ერთი მაღალჩინოსნისგან მიიღო. ჩანაწერის თანახმად, ვასკესი არაფერს დაუშავებდა მძევლებს, თუკი მისი მოთხოვნა არ იქნებოდა უკუგდებული, ნათქვამია მოხსენებაში. ფურცელზე ვასკესს ასევე ეწერა, რომ „აშშ-ის რეჟიმმა გაძარცვა და სხვა ცუდი ქმედებებიც ჩაიდინა ლათინური ამერიკის ხალხის წინააღმდეგ.“ გაურკვეველი რჩება, როგორ აპირებდა ის მძევლების გაკონტროლებას და მათ მძევლად დატოვებას.
ლუის ვასკესს, როგორც ირკვევა, საკმაოდ გრძელი კრიმინალური ისტორია ჰქონდა. ის ბევრჯერ ყოფილა დაჭერილი და იძებნებოდა კიდეც წარსულში.