საქველმოქმედო ორგანიზაცია „სამარიტელის ქისამ“ გუშინ, ზამთრისათვის საჭირო ნივთებით სავსე თვითმფრინავი (DC-8) გაგზავნა სომხეთის დედაქალაქ ერევანში. ორგანიზაცია თბილ ტანსაცმელს დაურიგებს იმ ოჯახებს, რომლებიც სომხეთსა და აზერბაიჯანს შორის დაწყებულ, მთიანი ყარაბაღის კონფლიქტს გამოექცნენ. „სამარიტელის ქისის“ გუნდმა 11 ტონაზე მეტი ზამთრის ტანსაცმელი და საბნები ჩაიტანა ერევანში.
კონფლიქტის ზონიდან გაქცეული ადამიანებიდან, დაახლოებით, 80 ათასმა 400 კილომეტრი გაიარა ერევნამდე. ბევრი მათგანი მეგობრებსა და ნათესავებთან აფარებს თავს. „სამარიტელის ქისა“ უკვე მუშაობს იმისათვის, რომ საკვებით სავსე ყუთები მიაწოდოს გასაჭირში მყოფ ამ ოჯახებს.
„დიდად გულსატკენია სომხეთსა და აზერბაიჯანს შორის არსებული კონფლიქტი. ათასობით ადამიანი იძულებული გახდა, გაქცეულიყო. გთხოვთ ილოცოთ, რომ ღმერთის მფარველობა იყოს ამ ოჯახებზე და ილოცოთ ასევე ჩვენი გუნდისათვის, რომელიც იესო ქრისტეს სახელით ეხმარება ხალხს.“ – განაცხადა ორგანიზაციის პრეზიდენტმა, ფრანკლინ გრემმა.
ორგანიზაცია აზერბაიჯანთანაც აწარმოებს მოლაპარაკებას კონფლიქტით დაზარალებულთათვის დახმარების გაგზავნის თაობაზე.
შეგახსენებთ, რომ მთიანი ყარაბაღი მრავალი წლის განმავლობაში სადავო ტერიტორია იყო ამ ორი ქვეყნისთვის. 1988 წელს დაწყებული შეიარაღებული კონფლიქტი სომხეთსა და აზერბაიჯანს შორის, 1990-იანი წლების დასაწყისში უკვე მასშტაბურ ომში გადაიზარდა. საომარი მოქმედებები 1994 წლამდე გაგრძელდა და საბოლოოდ, რეგიონი ადგილობრივი სომხების კონტროლის ქვეშ გადავიდა, რომლებმაც ყარაბაღის ტერიტორიაზე დამოუკიდებლობა გამოაცხადეს. მიუხედავად ამისა, შეტაკებები მაინც გრძელდებოდა. მათ შორის ყველაზე მასშტაბური იყო 2016 წელს მომხდარი შეტაკება და 2020 წლის სექტემბერში განახლებული კონფლიქტი.