2021 წლის 29 იანვარს პაკისტანის პოლიციამ არ მიიღო ღვთის გმობასთან დაკავშირებული ბრალდება ქრისტიანი ექთნის წინააღმდეგ. თუმცა მალევე, ისლამისტების ზეწოლის გამო იძულებული გახდა, საქმე აღეძრა.
28 იანვარს კარაჩიში არსებული ჰოსპიტლის თანამშრომლებმა კათოლიკე ექთანს, ტაბიტა ნაზირ გილის, ბრალი დასდეს ისლამის გმობაში. მათ სცემეს მას და ოთახში ჩაკეტეს.
პოლიციამ დაკითხა ნაზირ გილი და გაათავისუფლა იგი, რადგან მიიჩნია, რომ ეს იყო ცრუ ბრალდება და თანამშრომელთა მხრიდან შურისძიების მცდელობა. ამის შემდეგ, მოსარჩელე საბა ვასის მოწოდებით, პროტესტის ნიშნად, ისლამისტების ბრბომ ალყა შემოარტყა პოლიციის შენობას. ნაზირ გილი და მისი ოჯახი იძულებული გახდა, დამალულიყო.
ვასი აცხადებს, რომ ნაზირ გილის სიტყვებით, იესო ქრისტე არის ერთადერთი ნამდვილი მხსნელი და რომ მუჰამედი არ არის მნიშვნელოვანი.
ჰოსპიტლის თანამშრომლის მიერ გადაღებულ ვიდეოში, რომელიც სოციალურ მედიაში გავრცელდა, ასახულია, როგორ ითხოვს შველას ნაზირ გილი. თანამშრომლები სახეში ურტყამენ და ჩქმეტენ; ბლოკნოტს და კალამს აძლევენ და აიძულებენ, ხელი მოაწეროს აღიარებას.
ხუცეს ერიკ საჰოტრას თქმით, ვიღაცამ მალევე გამოიძახა პოლიცია და გაათავისუფლა ნაზირ გილი. ხუცესი ერთ-ერთი პირველი მივიდა პოლიციის განყოფილებაში, სადაც ექთანს კითხავდნენ. მისივე განცხადებით, საქმე არ აღძრულა მუსლიმანი ექთნის წინააღმდეგ, რომელმაც დანარჩენი თანამშრომლები წააქეზა კათოლიკე ექთნის წინააღმდეგ.
შეგახსენებთ, რომ ორგანიზაცია Open Doors-ის 2021 წლის ანგარიშის მიხედვით, პაკისტანი მსოფლიოში მეხუთე ადგილზეა ქრისტიანთა დევნის მხრივ.