International Christian Concern-ის ცნობით, 15 დეკემბერს 10-წლიანი პატიმრობის შემდეგ ლაჰორის უზენაესმა სასამართლომ უდანაშაულოდ ცნო პაკისტანელი ქრისტიანი, იმრან გეფორ მასიჰი, რომელსაც უვადო პატიმრობა ჰქონდა მისჯილი ღვთის გმობის ბრალდებით.
მასიჰის ოჯახის წევრები აცხადებენ: „უფალმა შეისმინა ჩვენი ვედრება და უზომოდ მადლიერნი ვართ ამისთვის. ეს ჩვენი საშობაო საჩუქარი იყო.“
2009 წლის 1-ელ ივლისს, იმრანი წიგნის მაღაზიას ასუფთავებდა, რომელიც თავის ოჯახს ეკუთვნოდა. მას უნდა დაეწვა ზედმეტი, გამოუსადეგარი ნივთები, როგორებიცაა ძველი წიგნები და ფურცლები. უცებ ერთ სახელმძღვანელოს გადააწყდა, არაბული წარწერით. დააფიქრა იმ ფაქტმა, რომ წიგნი რელიგიურ ნაწერებს შეიცავდა. შეშფოთებულმა იმრანმა თავის მეზობელს, ჰაჯი ალის მიმართა. ალიმ წიგნის დაწვა ურჩია. იმრანი ასეც მოიქცა და წიგნი ცეცხლში ჩააგდო. თუმცა მისი წასვლის შემდეგ ალიმ ნახევრად დამწვარი წიგნი უკან ამოიღო და იმრანს ბრალი წაუყენა ყურანის დაწვაში. ოჯახის თქმით, ალის პირადი ბიზნესმიზნები ამოძრავებდა მაღაზიასთან დაკავშირებით.
ეს ამბავი მალევე გავრცელდა, რის შემდეგაც მასიჰს სახლში შეეჭრნენ და მას, მის ძმასა და მამამისს თავს დაესხნენ.
პოლიციამ იმრან მასიჰი დააკავა. პოლიციის განყოფილების გარეთ კი 1000-მდე მუსლიმანი შეიკრიბა. ისინი ყურანის შეურაცხყოფის გამო ქრისტიანი იმრანის ჩამოხრჩობას მოითხოვდნენ.
2010 წლის იანვარში მასიჰს სამუდამო პატიმრობა მიუსაჯეს. CBN News-ის ცნობით, მისი საქმე გაასაჩივრეს, მაგრამ თითქმის 70-ჯერ გადადეს.
ICC-ის თანახმად, პაკისტანში ღვთის გმობის ბრალდებით, სულ მცირე, 24 ქრისტიანი იმყოფება პატიმრობაში.