პაკისტანში ეკლესიას თავს დაესხნენ ეკლესიის საკუთრების მიტაცების მიზნით

80 ნახვა
8 გაზიარება
0 კომენტარი

პაკისტანში ქრისტიანების დევნა და შევიწროება გრძელდება, ამის ნათელი მაგალითია ის, რომ გასულ შაბათს ერთ-ერთ ეკლესიას თავს დაესხა რადიკალურ მუსლიმანთა ჯგუფი.  

ხუცესმა სამუელ ბარკატმა, რომელიც პანჯაბის პროვინციაში არსებული წმ. სამების სახელობის ორმოცდაათიანული ეკლესიის წინამძღვარია, განუცხადა ორგანიზაციას International Christian Concern, რომ თავდამსხმელებმა დააზიანეს ეკლესიის კედელი და მთავარი შემოსასვლელი.  

„პანდემიით გამოწვეული მდგომარეობის გამო ეკლესიების შენობები დაკეტილია და მორწმუნეები ვეღარ დადიან ღვთისმსახურებებზე. თავდამსხმელებმაც სწორედ ამით ისარგებლეს და ხელსაყრელი დრო შეარჩიეს საკუთარ მოტივთა განსახორციელებლად.“

ბარკატის თქმით, ეკლესია, დაახლოებით, 350 ქრისტიანულ ოჯახს ემსახურება ჰაკიმპურაში. მისივე ინფორმაციით, თავდამსხმელებს მეთაურობდა ეკლესიის მეზობლად მცხოვრები მუსლიმანი მამაკაცი, რომელსაც ეკლესიის გვერდით აქვს მიწა და არაერთხელ უცდია ეკლესიის საკუთრების მიტაცება.

მამაკაცმა დააზიანა ეკლესიის კედელი, ეზოში არსებული სასაფლაო, შეიჭრა ეკლესიაში და შებღალა ჯვარი და სხვა სიწმინდენი.

ეკლესიებზე თავდასხმა პანდემიის დროსაც გრძელდება, იზრდება ქრისტიანთა მიმართ სიძულვილი, ხელისუფლებას კი არავითარი გეგმა არ გააჩნია რელიგიურ უმცირესობათა დასაცავად.