„ნეტფლიქსზე“ 2020 წლის 9 სექტემბერს გასულმა ფრანგულმა ფილმმა „Cuties“ დიდი აჟიოტაჟი გამოიწვია საზოგადოებაში, რადგანაც მრავალი ადამიანის აზრით, ფილმის შინაარსი მიმართულია 11 წლის გოგონების სექსუალიზებისკენ და ხელს უწყობს პედოფილიის ნორმალიზებას.
ფილმმა ჯერ კიდევ ჩვენებამდე, სარეკლამო ბანერის გამო დაიმსახურა მწვავე კრიტიკა. მასზე გამოსახულები არიან მოკლე საცეკვაო ტანსაცმელში გამოწყობილი, გამომწვევად მდგარი პატარა გოგონები.
„ტვიტერის“ უამრავმა მომხმარებელმა ფილმი ბავშვთა პორნოგრაფიას შეადარა და განაცხადა, რომ „ნეტფლიქსის“ გამოწერას გააუქმებდნენ. ასევე „ნეტფლიქსის“ მიმართ პროტესტის ნიშნად, უამრავი ადამიანი იყენებდა სოციალურ ქსელში „ჰეშტეგს“ – #cancelnetflix. გარდა ამისა, ინტერნეტსივრცეში გავრცელდა პეტიცია „ნეტფლიქსის“ გამოწერის გაუქმების მოთხოვნით. პეტიციას ამჟამად ნახევარ მილიონზე მეტი ხელმომწერი ჰყავს.
„ფილმის დამცველები აცხადებენ, რომ სინამდვილეში ფილმი ბავშვების სექსუალიზაციის წინააღმდეგ არის მიმართული, თუმცა ფილმის აღწერილობა, შერჩეული კადრები და შინაარსი საერთოდ არ აკრიტიკებს ბავშვთა სექსუალურ ექსპლუატაციას.“ – წერს გამოცემა ChristianityToday.
რაც შეეხება თავად კომპანია „ნეტფლიქსს“, ის ცდილობს ფილმის დაცვას და აცხადებს, რომ ეს არის „შთამბეჭდავი ისტორია“, რომელიც გახლავთ „სოციალური კომენტარი ბავშვების სექსუალიზაციის წინააღმდეგ.“
ამის საპასუხოდ მეტ უოლში, გამოცემა „Daily Wire“-ის ჟურნალისტი, წერს: „ეს არ არის ბავშვთა სექსუალური ექსპლუატაციის წინააღმდეგ მიმართული ‘კომენტარი’, დღესავით ნათელია, რომ ეს არის სადიზმი!“
ებრაელმა მესიანისტმა სწავლულმა, მაიკლ ბრაუნმა კი განაცხადა, რომ ფილმი დიდი მონდომებით ახდენს იმის დემონსტრირებას, რის ვითომდა დაგმობასაც ცდილობს.
„მხოლოდ ისინი როდი არიან არაჯანსაღი ადამიანები, რომელთაც 11 წლის ბავშვები ამ ფილმში ათამაშეს (მათ შორის, მათი მშობლები, რომლებმაც შვილებს ამის ნება დართეს), არამედ მთელი ჩვენი ერი არაჯანსაღ მდგომარეობაშია და გარყვნილების მორევში იხრჩობა. ჩვენ ან მასობრივად უნდა გამოვიღვიძოთ სულიერად, ან დავიღუპოთ.“ – აცხადებს ბრაუნი.