11 ივნისს უგანდაში 70 წლის ხუცესსა და მის ცოლს რადიკალი ექსტრემისტები გზაში დაესხნენ თავს, რის შედეგადაც ხუცესი გარდაიცვალა. ფრანცის ობო იყო უფროსი ხუცესი „Mpingire Pentecostal Revival Church“-ში.
„გადაცმული მუსლიმანი ექსტრემისტები თავს დაგვესხნენ და სასტიკად გაგვისწორდნენ, ჩემს მეუღლეს ურწმუნოს ეძახდნენ. ერთ-ერთმა მათგანმა მითხრა, რომ ეს ჩემი მეუღლისთვის ბოლო დღე იყო. მე ოდნავ ავუჩქარე ფეხს, და სწორედ ამ დროს მომესმა ჩემი მეუღლის განწირული ყვირილი და მივხვდი, რომ მისი სიცოცხლე საფრთხეში იყო…“ – ჰყვება ხუცესის ცოლი ქრისტინა ობო.
მკვლელობაში ბრალდებულმა დანაშაული აღიარა და თქვა, რომ ეს ალაჰის სიტყვების გამო გააკეთა; მან დაავალა, რომ მოკლას ყველა, ვინც უარყოფს ისლამს.
უნდა აღინიშნოს, რომ უგანდაში ხშირია თავდასხმები ქრისტიანებზე მიუხედავად იმისა, რომ უგანდის კონსტიტუციის მიხედვით, დაშვებულია რელიგიის თავისუფლება, მათ შორის, საკუთარი რწმენის პროპაგანდა და ერთი რწმენიდან მეორეზე მოქცევა.
„CBN News“-ის მიერ ადრე გავრცელებული ინფორმაციით, რადიკალმა მუსლიმანმა ქალმა 13 წლის ქრისტიანი გოგონა და მისი 11 წლის ძმა გაიტაცა და მიჰყიდა შამანს რიტუალური მსხვერპლშეწირვისთვის. „CBN“-ის ცნობით, უგანდაში, დაახლოებით, 3 მილიონი შამანია. ასობით უგანდელ ბავშვს კი იტაცებენ და კლავენ, რადგან ეს ადამიანის მსხვერპლშეწირვის წარმატებული ბიზნესის ნაწილია.
ცნობილია, რომ უგანდელი ექიმბაშები ცხოველის მსხვერპლად შეწირვისთვის 400 აშშ დოლარს ითხოვენ, ადამიანის მსხვერპლშეწირვის ღირებულება კი ამ თანხას ბევრად აღემატება. წლიდან წლამდე იზრდება მშობლების მიერ შვილების გაყიდვის შემთხვევებიც. უგანდელი ე. წ. მკურნალი შამანები საზოგადოებაში ავტორიტეტით სარგებლობენ. მათ ჰყავთ პირადი მცველები და თვითონაც შეიარაღებულები არიან. ხალხი მათ ძვირფას საჩუქრებს უძღვნის და რიტუალების ჩასატარებლად, ხშირად საკუთარ შვილებსაც კი სთავაზობს. ცრურწმენის თანახმად, თუ ახალი შენობის საძირკველში ბავშვის მოკვეთილ თავს დამარხავენ, ეს დაწყებულ საქმეს წარმატებას მოუტანს. გამდიდრების სურვილით შეპყრობილი ადამიანები უგანდელ შამანებთან მიდიან და საკუთარი ოჯახიდან ან ქუჩიდან მოტაცებული ბავშვის მსხვერპლად შეწირვაზე თანხმდებიან.
ბავშვების მსხვერპლად შეწირვა უგანდაში იმდენად სერიოზული და ფართოდ გავრცელებული პრობლემაა, რომ უგანდის მთავრობამ ბავშვთა მსხვერპლშეწირვისა და ტრეფიკინგის საწინააღმდეგო ჯგუფიც კი შექმნა.
შეგახსენებთ, რომ უგანდა აღმოსავლეთ აფრიკაში მდებარე ქვეყანაა, სადაც მოსახლეობის თითქმის 40% კათოლიკე ქრისტიანია, ანგლიკანები შეადგენენ 32%-ს, სხვა პროტესტანტული დენომინაციები – 13%-ს, ხოლო მუსლიმანები – 12%-ს. მიუხედავად ამისა, ქრისტიანებს აქტიურად დევნიან ისლამისტები.