„ამერიკის შეერთებულ შტატებში ქრისტიანებს განსხვავებულად ეპყრობიან, ვიდრე სხვა რელიგიების წარმომადგენლებს.“ ‒ განაცხადა პრეზიდენტმა ტრამპმა გასულ შაბათს და პოლიტიკური ლიდერები გააკრიტიკა რელიგიებისადმი არათანაბარი მოპყრობის გამო.
ტრამპმა ეს მას შემდეგ განაცხადა, რაც მას თეთრ სახლში გამართულ ბრიფინგზე “ტვიტერზე” გამოქვეყნებული პოსტის შესახებ ჰკითხეს (ხსენებული პოსტი მას პოლიტიკური კომენტატორის, პოლ სპერის “ტვიტერიდან” ჰქონდა გადატანილი):
„ვნახოთ, ხელისუფლება მეჩეთებშიც თუ მოითხოვს სოციალური დისტანციის დაცვას, როგორც ეს ეკლესიებს მოსთხოვა აღდგომის დღესასწაულზე.“
ტრამპმა განმარტა, რომ მისი პოსტი პოლიტიკოსებისადმი იყო მიმართული და არა იმამებისადმი.
„მე მორწმუნე ადამიანი ვარ. არ აქვს მნიშვნელობა, რა რწმენის ხართ, მაგრამ, როგორც ჩანს, ჩვენი პოლიტიკოსები სხვადასხვა რწმენას სხვადასხვაგვარად ეპყრობიან. არ ვიცი, რა დაემართა ჩვენს ქვეყანას, მაგრამ ქრისტიანული რწმენისადმი დამოკიდებულება ახლა სრულიად სხვანაირია, ვიდრე ადრე და ვფიქრობ, რომ ეს დამოკიდებულება ძალიან უსამართლოა.“
