Religious News Service-ისათვის მიცემულ ექსკლუზიურ ინტერვიუში აშშ-ის პრეზიდენტმა დონალდ ტრამპმა რწმენასთან დაკავშირებული სხვადასხვა საკითხის შესახებ ისაუბრა, მათ შორის, საკუთარ პირად სულიერ ცხოვრებასთან დაკავშირებით. ინტერნეტგამოცემასთან საუბრისას მან განაცხადა, რომ საკუთარ თავს ახლა „არადენომინაციურ ქრისტიანს“ უწოდებს და ღმერთს მადლობას უხდის კოვიდ-19-ისგან განკურნებისათვის.
ტრამპი პრესვიტერიანელად აღიზარდა. მისი კონფირმაცია მოხდა 1959 წელს ქუინსში, იამაიკის „პირველ პრესვიტერიანულ ეკლესიაში“, რომელიც 1662 წელს დაარსდა და აშშ-ში ყველაზე ძველი, მოქმედი პრესვიტერიანული ეკლესიაა.
„მშობლები პატარაობიდანვე მასწავლიდნენ რწმენისა და ლოცვის მნიშვნელობას. მიუხედავად იმისა, რომ ჩემი კონფირმაცია ბავშვობაში მოხდა პრესვიტერიანულ ეკლესიაში, ახლა საკუთარ თავს არადენომინაციურ ქრისტიანად მივიჩნევ,“ – აცხადებს ტრამპი.
კითხვას იმასთან დაკავშირებით, თუ რა ისწავლა კოვიდ-19-თან ბრძოლისას, პრეზიდენტმა უპასუხა, რომ ის გრძნობდა ამერიკელთა ლოცვებს.
„სასწაულები მოდიოდა ზეციდან. იმას ვგულისხმობ, რომ მე და მელანია დიდად მადლიერნი ვართ ღმერთის, ჩვენს ოჯახზე ზრუნვისა და განკურნებისათვის.“ – წერს ტრამპი.
ინტერვიუში მან ასევე დადებითად შეაფასა საქველმოქმედო ორგანიზაცია „სამარიტელის ქისის“ და მისი პრეზიდენტისა და აღმასრულებელი დირექტორის, ფრანკლინ გრემის მუშაობა.
„ამ საოცარ ადამიანებს უყვართ ამერიკა და აქვთ ნამდვილი სურვილი იმისა, რომ ერთობლივად იშრომონ ამერიკელთა ცხოვრების გაუმჯობესებისთვის. ვაფასებ მათ ლოცვებს და მამხნევებს მათი დიდი რწმენა.“ – ამბობს პრეზიდენტი.