ტრამპი ხელს აწერს ბრძანებას მსოფლიოში რელიგიური თავისუფლების შესახებ

474 ნახვა
28 გაზიარება
0 კომენტარი

პრეზიდენტმა ტრამპმა ხელი მოაწერა აღმასრულებელ ბრძანებას რელიგიური თავისუფლების შესახებ, რომლის მიხედვითაც 50 მლნ. დოლარი იქნება გამოყოფილი მთელ მსოფლიოში საერთაშორისო რელიგიური თავისუფლების დასაცავად მიმართული პროგრამების განსახორციელებლად.  

როგორც გამოცემა The Hill-ი წერს, განკარგულების თანახმად, აშშ-ის სახელმწიფო დეპარტამენტს დაევალა, უფრო მეტი კონკრეტული ქმედება განახორციელოს ისეთ ქვეყნებში, სადაც რელიგიური თავისუფლება ირღვევა. განკარგულება ასევე მოუწოდებს დიპლომატებს, პარტნიორ ქვეყნებთან რელიგიური დისკრიმინაციის შემთხვევების პრობლემა წამოჭრან.

„ამგვარი პროგრამები შეეხება ისეთ ადამიანებს და ჯგუფებს, რომლებსაც ემუქრებათ დევნა და თავდასხმანი რელიგიის საფუძველზე; პროგრამები ასევე მიზნად ისახავს, დაეხმაროს ამ ჯგუფებს, შეინარჩუნონ იდენტობა.

ეს პროგრამები მიმართულია ასევე იმისკენ, რომ დააყენოს თავმდამსხმელთა პასუხისმგებლობის საკითხი; უზრუნველყოს თანაბარი უფლებები და კანონიერი დაცვა ცალკეული ადამიანებისა თუ ჯგუფებისათვის, მიუხედავად მათი მრწამსისა; გააუმჯობესოს ყველა მრწამსის წარმომადგენელ ადამიანთა სამლოცველო სახლების დაცვა და უსაფრთხოება და დაიცვას რელიგიურ თემთა კულტურული მემკვიდრეობა.

მდივანი მიმართავს დიპლომატიურ მისიათა ხელმძღვანელებს იმ ქვეყნებში, რომლებიც განსაკუთრებული შეშფოთების ობიექტს წარმოადგენენ, ქვეყნებში, რომლებიც განსაკუთრებულ სადამკვირვებლო სიაში არიან, ან ქვეყნებში, სადაც აღრიცხულია რელიგიური თავისუფლების ხელყოფის შემთხვევები.

ეს ყველაფერი მიმართულია იმისკენ, რომ შემუშავებულ იქნეს შესაბამისი სამოქმედო გეგმები აშშ-ისთვის ინფორმაციის მიწოდებისათვის, ასევე იმისათვის, რომ მხარი დაუჭიროს მას საერთაშორისო რელიგიური თავისუფლებისათვის ხელის შეწყობაში და უბიძგოს სხვა ქვეყნების მთავრობებს, გადადგან ნაბიჯები რელიგიური თავისუფლების ხელყოფის აღმოსაფხვრისაკენ.” – ნათქვამია ბრძანებაში.

ეს ბრძანება სრულიად შეესაბამება პრეზიდენტის ხედვას, დაიცვას საერთაშორისო რელიგიური თავისუფლების უფლებები. პრეზიდენტი ტრამპი გადამწყვეტ ნაბიჯებს დგამს, რათა შეასრულოს მთელ მსოფლიოში მცხოვრები მორწმუნეებისათვის მიცემული დაპირება.“ ‒ განუცხადა Fox News-ს პრეზიდენტის ადმინისტრაციის წარმომადგენელმა.

სამშაბათს პრეზიდენტი ტრამპი და პირველი ლედი ესტუმრნენ კათოლიკეთა სამლოცველოს ვაშინგტონში (National Shrine). მათ ყვავილების გვირგვინი დადეს წმ. იოანე პავლე II-ის ქანდაკებასთან.

ორშაბათ საღამოს პრეზიდენტი ტრამპი ეწვია წმ. იოანეს ეპისკოპალურ ეკლესიას, სადაც ბიბლიით ხელში ფოტო გადაიღო. პრეზიდენტის მისვლამდე სამართალდამცავებმა იქვე შეკრებილი აქციის მონაწილეები ძალის გამოყენებით დაშალეს.

სწორედ ამიტომ, სამლოცველოში დონალდ ტრამპის ვიზიტს ვაშინგტონის არქიეპისკოპოსის, უილტონ დ. გრეგორის უარყოფითი გამოხმაურება მოჰყვა, რომელმაც განაცხადა, რომ წინააღმდეგი იყო სამლოცველოში პრეზიდენტის ვიზიტისა.

„ჩემთვის დასაძრახი და დიდად უსიამოვნოა კათოლიკური სამლოცველოს ესოდენ არასწორად გამოყენება, რაც არღვევს ჩვენს რელიგიურ პრინციპებს, რომლებიც მოგვიწოდებს, დავიცვათ ყველა ადამიანის უფლება, თუნდაც არ ვიზიარებდეთ მათ მოსაზრებას. წმ. პაპი იოანე პავლე II ადამიანთა უფლებებისა და ღირსების მგზნებარე დამცველი გახლდათ და მისი მემკვიდრეობა ამაზე ცხადად მეტყველებს. ის ნამდვილად არ მოიწონებდა ცრემლსადენი გაზისა და სხვა საშუალებების გამოყენებას ადამიანთა წინააღმდეგ, მათ დაშლასა და შევიწროებას ფოტოს გადასაღებად ადგილზე, რომელიც თაყვანისცემისა და მშვიდობისათვის არის განკუთვნილი.“ განაცხადა არქიეპისკოპოსმა.